Maria Tviberg da la Norvegia è la nova campiunessa mundiala dal slalom gigant parallel. Ella batta Wendy Holdener en il final, uschia datti argient per la Svizra. En l'emprim percurs èn ellas stadas tuttina spertas. Quai è la tschintgavla medaglia per la Svizra.
Il podest
- Maria Tviberg (NOR)
- Wendy Holdener (SUI)
- Thea Louise Stjernesund (NOR)
Wendy Holdener ha battì en il mez final la Franzosa Marie Lamure ch'è crudada ora en il segund percurs.
Sco suletta dal team svizzer è ella sa qualifitgada per dapli che l'otgavelfinal. En il quartfinal ha ella battì Sara Hector da la Svezia. Camille Rast perda l'otgavelfinal cunter Thea Louise Stjernesund da la Norvegia ed da Andrea Ellenberger na tanschi betg cunter la Polonaisa Maryna Gasienica-Daniel.
Nagin um è sa qualifitgà
Per ils umens n'hai betg tanschì per ils finals. Nagin è stà spert avunda en la qualificaziun. Gino Caviezel ha manchentà la qualificaziun per sulettamain 0,01 secundas e Livio Simonet per 0,16 secundas. Semyel Bissig e Thomas Tumler n'han gnanc finì lur cursa.
Guadgnà la concurrenza tar ils umens ha il Tudestg Alexander Schmid. Cun quai ha el gudagnà l'emprima medaglia per la Germania.
- Alexander Schmid (GER)
- Dominik Raschner (AUT)
- Timon Haugan (NOR)
Nagin futur per cursas parallelas
Adina puspè è vegnì discutà davart las cursas parallelas. Fan quellas senn u betg? N'èn quellas cursas betg memia privlusas? Era las naziuns grondas da skis na levan betg questas cursas ed hai boicottà ellas davent da l'entschatta. Uss ha Michel Vion, il secretari general da la FIS, confermà envers RTS: «Nus smettain las cursas parallelas. Igl è da star mal perquai ch'i po in grond plus tar eveniments gronds.»
