En la cursa rapida ha Marco Odermatt gia persvadì sco quart, malgrà che quai n’è betg sia disciplina da parada. Odermatt è da chasa en il slalom gigant, nua ch'el è in dals top favurits sin il titel da campiun mundial.
Ils top-favurits
- Alexis Pinturault (FRA)
- Marco Odermatt (SUI)
- Filip Zubcic (CRO)
En questa stagiun èn gia vegnids manads atras sis slaloms gigants da la cuppa mundiala. Alexis Pinturault è adina stà classà tranter ils top 5. Las davosas trais cursas ha il Franzos schizunt gudagnà. Pinturault, ch’ha gia gudagnà argient en la cumbinaziun e bronz en il super-G, è uschia il grond favurit sin aur.
Ina grondiusa e constanta stagiun ha er Marco Odermatt mussà en questa disciplina. Il skiunz da 23 onns è adina stà classà tranter ils top 4. Quatter giadas è Odermatt stà sin il podest. Tranter auter ha el gudagnà il slalom gigant da Santa Caterina. Las schanzas èn pia grondas che Odermatt gudogna il venderdi sia emprima medaglia ad in campiunadi mundial.
Ils ulteriurs svizzers e cunfavurits
- Loïc Meillard
- Gino Caviezel
- Justin Murisier
Swiss-Ski ha il mument in dals pli ferms caders en la disciplina slalom gigant, da quai pon autras naziuns be siemiar. Sper Marco Odermatt èn en questa stagiun numnadamain er Loïc Meillard, Gino Caviezel e Justin Murisier stads almain ina giada sin il podest. Quai è capità la davosa giada la stagiun 1996/97. Avant 24 onns aveva Michael von Grünigen gudagnà aur als campiunadis mundials a Sestriere. Briglià en questa cursa avevan er Steve Locher sco quart e Paul Accola sco 5avel.
Ulteriurs candidats da medaglia
- Henrik Kristoffersen (NOR)
- Luca De Aliprandini (ITA)
- Zan Kranjec (SLO)
Als davos campiunadis mundials il 2019 ad Äre en Svezia aveva Henrik Kristoffersen triumfà avant l’Austriac Marcel Hirscher ed il Franzos Alexis Pinturault.