Marco Odermatt gudogna era ils segund slalom gigant da la cuppa mundiala da questa stagiun e repeta sia victoria da l'onn passà a Val d'Isère. En omadus percurs ha il skiunz da la Sutsilvania realisà il meglier temp e declassescha la concurrenza. L'Austriac Manuel Feller ch'è vegnì segund perda 1,4 secundas. Il terz, il Sloven Zan Kranjec perfin 2 secundas. Per Marco Odermatt èsi la 14avla victoria en in cursa da la cuppa mundiala. Il slalom gigant a Val d'Isère è sia terza victoria quest enviern suenter ses triumf en il slalom gigant a Sölden ed il Super-G a Lake Louise.
Ferma prestaziun svizra ed emprims puncts
Sper Marco Odermatt èn anc ulteriurs 6 skiunzs svizzers classads en ils puncts. Tranter quels quatter Grischuns. Thomas Tumler vegn 14avel e realisescha ses meglier resultat en la cuppa mundiala dapi 12 mais.
Persvadì han era ils dus giuvens Grischuns. Fadri Janutin vegn 17avel e guogna ses emprims puncts en in slalom gigant da la cuppa mundiala.
Per il Surmiran Livio Simonet datti era en sia segunda cursa en la cuppa mundiala puncts. Il frar pitschen da Sandro Simonet terminescha la cursa a Val d'Isère sco 19avel. Gia tar ses debut en la cuppa mundiala, l'ocotober a Sölden, avevi dà puncts per Livio Simonet sco 25avel.
Ils Svizzers:
- 1. Marco Odermatt
- 10. Loïc Meillard +2,95
- 14. Thomas Tumler +3,62
- 17. Fadri Janutin +3,87
- 19. Livio Simonet +4,09
- 21. Gino Caviezel +4,19
- 25. Semyel Bissig +4,65
- OUT Justin Murisier