En las navaglias da Palisades Tahoe en ils stadis unids hai gista dà duas grondas premieras. Il grond talent da la Norvegia Alexander Steen Olsen gudogna si'emprima cursa en la cuppa mundiala ed Albert Popov da la Bulgaria fa per l'emprima giada il sigl sin il podest. Segund vegn nunspetgadamain il cumpatriot da Steen Olsen Timon Haugan.
- 1. Alexander Steen Olsen (NOR) 1:47,46 minutas
- 2. Timon Haugan (NOR) +0,05 secundas
- 3. Albert Popov (BUL) +0,24
- 3. Clément Noël (FRA) +0,24
Il temp il pli spert avess gì il grec AJ Ginnis, che ha gudagnà sensaziunalmain argient als campiunadis mundials. Suenter lungas discussiuns da la giura è el dentant vegnì disqualifitgà – el è ì sur ina stanga e betg enturn ella.
Svizzers cun difficultads en il segund percurs
Meglier Svizzer è stà Ramon Zennhäusern. Il Vallesan era en viadi per batter Steen Olsen, ha lura dentant fatg sbagls en l'ultim sectur.
Ils auters Svizers n'èn betg stads buns da lur bunas posiziuns suenter l'emprim percurs. Daniel Yule, ch'avess gì la schanza da surpassar a Lukas Braathan sco meglier slalomist da la stagiun, croda dal segund enavos sin il 24avel plaz. Er Loïc Meillard croda enavos 15 plazs.
- 6. Ramon Zenhäusern +0,45 Sekunden
- 21. Loïc Meillard +1,25
- 24. Daniel Yule +1,52
- Betg en il segund percurs: Luca Aerni (37.), Tanguy Nef (41.), Marc Rochat (DNF), Sandro Simonet (DNF), Fadri Janutin (DNF), Noel von Grünigen (DNF)
Per il final da la cuppa mundiala ils 19 da mars s'èn qualifitgads quatter Svizzers: Daniel Yule, Loïc Meillard, Ramon Zenhäusern e Marc Rochat.