Daniel Yule, il sulet Svizzer cun schanzas da medaglia suenter l'emprim percurs, ha era mussà in segund percurs fitg solid ed uschia anc pudì sa megliurar dal 9avel sin il 5avel plaz. L'anteriur leader da l'equipa svizra po esser cuntent cun quest resultat. En questa stagiun è Yule numnadamain stà classà be duas giadas sut ils top 10. Tant al classicher dad Adelboden sco era tar l'emprim slalom da la stagiun ad Alta Badia è il Vallesan vegnì 7avel.
Podest dal slalom dals umens:
- 1. Sebastian Foss-Solevaag (NOR) 1:46.48
- 2. Adrian Pertl (AUT) + 0,21
- 3. Henrik Kristoffersen (NOR) + 0,46
Trumpada per Ramon Zenhäusern
Nagina schanza da gudagnar ina medaglia ha gì Ramon Zenhäusern, il grond trumf svizzer. El ha pers gia en l'emprim percurs uschè bler temp, ch'el n'è betg stà classà tranter ils top 15 e n'ha uschia betg pudì profitar d'ina buna pista en il segund percurs ch'ha per ina giada cumenzà cun ils top 15. La finala è Ramon Zenhäusern vegnì 11avel cun in retard da 2,5 secundas sin Sebastian Foss-Solevaag.
Per ils dus ulteriurs Svizzers, Loïc Meillard e Luca Aerni, è la cursa gia stada baud a fin. Omadus èn crudads ora en l'emprim percurs.
Divers favurits han disditg
Il grond favurit, l'Austriac Marco Schwarz, sco era ses collega d'equipa Manuel Feller èn crudads ora. Ina cursa d'emblidar èsi er stà per Clément Noël. Il Franzos ha fatg in grond sbagl en il segund percurs ch'ha custà ad el passa 10 secundas.