Il sport da snowboard alpin ha a Scuol ina lunga tradiziun. En Engiadina Bassa è vegnida fundada l’onn 1986 l’emprima scola da snowboard en Europa. Ils frars Cla e Fadri Mosca, ch’èn omadus da Scuol èn vegnids campiuns mundials en questa disciplina durant ils onns novanta. Ed era il campiun olimpic Nevin Galmarini ha emprais a Scuol il sport sin l’aissa.
110 atlets ed atletas da 20 naziuns
Ditg n'èsi betg stà cler, sch’i saja pussaivel dad organisar a Scuol puspè cursas da la cuppa mundiala da snowboard alpin. Ils organisaturs han dentant adina cret vi da la pussaivladad da metter a disposiziun a las atletas ed als atlets ina stupenta pista e cundiziuns perfetgas.
Malgrà la situaziun actuala essan nus fitg, fitg cuntents
Las cursas da la fin d’emna han dà raschun als organisaturs. E quels èn vegnids remunerads cun aura perfetga, cun cursas spectacularas e perfin cun in plaz da podest. Tar las dunnas è Julie Zogg da Walenstadt vegnida terza.
