In onn avant l’eveniment grond en Engiadin'Ota èn quasi tut las disciplinas vegnidas testadas. En tut las disciplinas hai dà concurrenzas per testar l’infrastructura, las differentas cursas u concurrenzas, la collavuraziun cun ils tschients voluntaris e la logistica.
In onn avant l’eveniment grond è bler gia pront en Engiadin'Ota, las experientschas ch'ins ha fatg en las differentas concurrenzas èn da gronda valur. Uschia possian ins prender cun sai bleras experientschas e sa chapescha anc lavurar vi dal concept, di Milan Drouck, mainagestiun dals campiunadis mundials.
I dovra anc la planisaziun en detagl, nua che nus vegnin a planisar tut enfin en il pli pitschen detagl, per esser segira ch'i funcziuna.
Igl è da gronda impurtanza da testar tut
L’Engiadin'Ota ha gia ina gronda tradiziun ed experientscha dad organisar cursas u concurrenzas da livel mundial. La pli gronda experientscha ha la regiun en il sectur da ski alpin. Snowboard e freestyle è dentant tut in autra chaussa, perquai èsi impurtant da pudair testar er en questas disciplinas. Fin uss è tut gartegià magari bain ed ils organisaturs èn da buna speranza ch'ins po porscher bunas concurrenzas sin il Corvatsch ed er sin la Corviglia, il mars da l’onn proxim. Totalmain vegn quai a dar 28 decisiuns da medaglias en 15 differentas disciplinas. Durant duas emnas vegn la regiun ad esser il «Mecca» dal sport da snowboard e da freestyle.
