Jan Scherrer ha gudagnà la medaglia d’argient als X-Games ad Aspen, Colorado en ils Stadis unids da l'America . Ils X-Games èn ina da las concurrenzas da freestyle las pli prestigiusas. Per l'atlet da Sogn Gagl èsi la segunda medaglia als X-Games. Il 2020 ha el gudagnà bronz. La medema medaglia ha Scherrer gudagnà en la halfpipe als gieus olimpics a Peking l’onn passà. Meglier ch’il Svizzer ad Aspen è be stà l’Australian Scotty James. Terz è vegnì Valentino Guseli, ch'è anc da l'Australia.
Gremaud sper il podest
Naginas medaglias als X-Games n’hai percunter dà per las skiunzas da freestyle svizras. Mathile Gremaud n’ha betg pudì defender ses titel en il Big Air da l’onn passà ed è vegnida quarta. Sarah Höfflin è vegnida sisavla. Gudagnà ha la Canadaisa Megan Oldham davant la Tess Ledeuc da la Frantscha e la Scozaisa Kristy Muir.