Siglir tar il cuntegn

Header

«Tregants Val Müstair» èn nov campiuns svizzer da tir.
Legenda: Ils «Tregants Val Müstair» èn nov campiuns svizzer da tir. Vischnanca Val Müstair
cuntegn

Sport da tir 2022 a Thun Aur per la Societad da tregants Chalavaina Val Müstair

En il final sur 300 meters a Thun ha la Societad da tregants Chalavaina Val Müstair cuntanschì cun 1489 puncts il meglier resultat. Ils Jauers gudognan uschia per l’emprima giada il titel da campiuns svizzers sur 300 meters cun l'arma da sport.

Gia durant l’entira stagiun da tir è la Societad da tregants Chalavaina Val Müstair stada ina da las pli fermas gruppas da l’entira Svizra. Suenter ils trais tirs da la prerunda eran ils Jauers sin l'emprima plazza dal classament intermediar. Uschia èn els sa qualifitgads per il tir final a Thun. En quest han els stuì sa mesirar cun trais autras gruppas. Mintgin dals otg commembers da la societad da tregants ha stuì trair en venter 20 tuns cun il schluppet sur 300 meters. Per quest program ha mintgin dals otg tregants gì ina mes'ura temp. A la fin dal program ha la Societad da tregants Chalavaina Val Müstair pudì notar in total da 1489 puncts. Els han gudagnà il final cun 20 puncts avantatg sin la concurrenza.

audio
Intervista cun Rico Hohenegger
ord Actualitad dals 01.11.2022.
laschar ir. Durada: 2 minutas 54 Secundas.

Preparaziun suboptimala

Cun la fin d'avust è la stagiun da trair a schiba a fin. Alura va ina gronda part dals commembers da la Societad da tregants Chalavaina Val Müstair a chatscha. N'er betg optimal è stà che la gruppa da trair è vegnida a savair ch’ella è en il final be paucs dis avant la concurrenza. L’invit per ir al final era arrivà en la chascha da brevs dad in commember ch'era absent. Uschia han ins stuì organisar tut a la svelta, quasi senza trenament. La gruppa ha be pli pudì far in trenament avant il final. Quel trenament è dentant gartegià uschè bain ch'ils tiradurs èn sa mess cun in bun sentiment sin viadi a Thun. Ed il bun sentiment ha dà raschun als tiradurs da la Val Müstair: Suenter la concurrenza da final han els pudì festivar per l’emprima giada il titel da campiuns svizzers cun l’arma da sport sur 300 meters.

Ina delegaziun ha beneventà dumengia saira ils novs campiuns svizzers cun musica e bavrondas en Val Müstair.

E la vischnanca guarda cun plaschair en l'avegnir: Per l'ina sin l'onn proxim nua ch'il «Tir da la Chalavaina» ha lieu en la val, sco er sin l'onn 2024 cura che la festa chantunala da tir ha lieu en Val Müstair ed il Grischun dal Sid.

RTR novitads 17:00

Artitgels legids il pli savens

Scrollar a sanestra Scrollar a dretga