Il test da l'equipa naziunala da ballape cunter la Bielorussia è gartegià – almain quai che pertutga il resultat: la Svizra gudogna cun 1:0. Il gol decisiv ha Xherdan Shaqiri marcà gia en la 9avla minuta e quai cun in sajet da distanza da bundant 20 meters en la crusch da la latta.
Dentant n'èsi durant l'entir gieu betg propi gartegià als Svizzers da procurar per grond privel davant il gol da la Bielorussia. Il gol da Shaqiri è uschia restà il sulet highlight da la partida en il stadion «La Maladière» a Neuschatel. La Svizra aveva bain adina sut controlla il gieu, ma bunas schanzas da far in gol èn stadas raras durant l’entira partida.
Sco proxim dat la naziunala en in'emna ordaifer cunter las Inslas Feroe in gieu da qualificaziun per il campiunadi mundial.
RR novitads 23:00