Siglir tar il cuntegn

Header

Ina cuppa snus.
Legenda: Ina tipica cuppa snus. Reuters
cuntegn

Droga dal sport «Il snus deva in bun sentiment»

Daniel Telli (49) ha durant sia carriera da unihockey giugà 74 gieus per la naziunala Svizra. El ha, tranter auter, gudagnà argient al campiunadi mundial il 1998. Insatge che ha dentant er accumpagnà il giugader da Trin durant sia carriera è il snus.

Daniel Telli ha fatg ina bella carriera d'unihockey. Cumenzà sia carriera ha el a Trin, suenter ha el midà tar Torpedo Cuira, nua ch'el è er vegnì giugader naziunal. Tar Torpedo ha el dentant er cumenzà a consumar snus amez ils onns 90 cura ch'el aveva 23-24 onns. Quai saja stà cura ils emprims giugaders da la Svezia èn vegnids en Svizra a dar unihockey, sa regorda l'um che ha oz 49 onns. Blers giugaders svizzers hajan lura empruvà ina giada quest snus.

Tscherts han chalà da prender snus, auters han cuntinuà.
Autur: Daniel Tellianteriur giugader d'unihockey

L'attatgader ha cuntinuà ed il snus ha accumpagnà el durant radund diesch onns da sia carriera. El menziuna dentant ch'el na haja betg prendì snus durant ils gieus. I saja stà insatge per prender spezialmain suenter ils trenaments u suenter ils gieus. Suenter in gieu gidava il snus a Daniel Telli da sa calmar. Sco tar blers congiugaders tutgavan quels plimatschs pitschens cun tubac simplamain tar il mintgadi.

El sa regorda dentant anc bain dal mument cura ch'el ha ditg: «Uss tanschi».

Jau avess stuì dumandar ina saira in giugader giuven sch'el haja in snus per mai. Lu ha quai sco fatg clic en il chau ch'i è in bun mument da chalar.
Autur: Daniel Tellianteriur giugader d'unihockey
Daniel Telli da la vart sanestra
Legenda: Suenter sia carriera sco giugader è Daniel Telli (sanester) er stà trenader d'unihockey durant in temp. MAD

Mancà n'ha il snus betg suenter a l'um da Trin. E quai mussia ch'il tubac na ha mai gì in effect sin la prestaziun sportiva. Insatge è cler per Daniel Telli: Sch'el fiss anc ina giada 23-24 onns na cumenzass el betg anc ina giada a consumar questa droga che deriva da la Scandinavia.

RR actualitad 07:00