Siglir tar il cuntegn
cuntegn

Sport Divers Il banc da puniziun dal HCD è uss ina lounge

L'idea cun ils bancs da puniziun en furma da tualettas è stà in'acziun da reclama reussida, gist perquai ch’ils bancs èn vegnids scumandads.

banc da puniziun en furma da tualettas
Legenda: Scumandads: Bancs da puniziun en furma da tualettas. MAD / communicaziun.ch
bancs da puniziun en furma da bogneras
Legenda: Lubids: Bancs da puniziun en furma da bogneras. MAD / communicaziun.ch

Ils bancs da puniziun dal Club da hockey da Tavau en furma da tualettas – quai è stà in’acziun da reclama pli che reussida per ina firma d’installaziuns sanitaras. Radios, televisiuns e gasettas han rapportà e las raits socialas èn stadas emplenidas cun commentaris.

Suenter che la Federaziun svizra da hockey ha scumandà ils bancs è l’effect da la reclama anzi anc stà pli gronds. Curt avant l’emprim gieu da la stagiun aveva il HCD gì da demontar ils bancs tut a la bahuta. Ils bancs che èn la finala vegnì lubids han la furma d’ina bognera. Quels en furma da tualettas avessan discredità ils giugaders.

Investiziuns da plirs millis francs per il giat?

L’entira acziun da reclama ha dentant in crutsch. Il banc da puniziun ch’è vegnì scumandà è ina construcziun speziala che ha custà plirs millis francs. Quai èn memia blers daners per simplamain dismetter sin la deponia da rument. L’agentura da communicaziun che ha gì l’idea per l’entira acziun da reclama ha dentant chattà ina schliaziun. Ella ha transfurmà il banc da puniziun en ina lounge da VIP ed ha plazzà quella en il sectur dals aspectaturs. Uschia exista il banc dispitaivel vinavant, simplamain en in’autra funcziun.

RR actualitad 08:00