Siglir tar il cuntegn

Header

Navigaziun

cuntegn

Maraton da skis 2019 Blera elita al 51avel maraton da l’Engiadina

Divers curriders da la cuppa mundiala partan questa dumengia al Maraton da skis engiadinais. Tranter auter èn quai Dario Cologna, Toni Livers e Roman Furger. E tar las dunnas è Nathalie von Siebenthal ina da las favuritas.

Curriders da passlung a la partenza dal maraton.
Legenda: Blera elita al 51avel Maraton da skis engiadinais. Keystone

Al 51avel maraton da l’Engiadina partan quest onn numerus curriders da la cuppa mundiala, tranter auter er ils Svizzers Dario Cologna, Toni Livers u Roman Furger. Cologna e Furger han schizunt la schanza da triumfar per la quarta giada al maraton da skis da Malögia fin a S-chanf. Tar las dunnas pudess la Franzosa Anouk Faivre-Picon gudagnar gia per la quarta giada.

Ils Svizzers survegnan oravant tut gronda concurrenza da la Frantscha e da la Norvegia. In participant da renum è tranter auter il Franzos Maurice Manificat ch’ha er gia gudagnà en questa stagiun ina cursa da la cuppa mundiala. Ensemen cun ses collegas Clément Parisse ed Adrien Backscheider ha Manificat plinavant gudagnà bronz en la cursa da staffetta als campiunadis mundials da ski nordic a Seefeld. Er ils Norvegiais cun Anders Gloersen, victur dal 2014, Tord Asle Gjerdalen e Chris Andre Jespersen tutgan tar ils favurits.

Premiera per Nathalie von Siebenthal

Tar las dunnas è Nathalie von Siebenthal ina da las grondas favuritas. La curridra da Swiss Ski ch’è vegnida avant in’emna 7avla en la cursa da 30 kilometers als campiunadis mundials a Seefeld parta per l’emprima giada al Maraton da skis engiadinais. Ina da las grondas concurrentas è franc la Franzosa Anouk Faivre-Picon ch’ha gia gudagnà trais giadas quest maraton.

Tut en tut partan 14’200 curridras e curriders ord bun 65 pajais al 51avel maraton da l’Engiadina. Questa cursa che vala sco ina da las pli grondas e popularas cursas insumma da passlung è gia vendida ora dapi la fin schaner.

RR Sportissimo 17:00