La nova «Cursa da notg» cun in traject da 17 kilometers da Segl fin a Puntraschigna, duai esser in’ulteriura attracziun per ils passlunghists durant l’emna dal Maraton da skis engiadinais. La cursa è pussaivla en tuttas duas tecnicas, classic e skating. Ils participants han d’avair cun els ina glisch da frunt cun quai che la loipa n’è betg illuminada sur tut il traject.
Grond interess
Per l’emprima ediziun da la «Cursa da notg» datti gia passa 300 annunzias. Tut tenor saja er bain pussaivel che nums prominents vegnan ad esser a la partenza la gievgia saira, uschia il president dal comité d’organisaziun, Menduri Kasper.
Acclimatisaziun n’è betg pli dumandada
Auter che anc avant 20 onns, na cusseglian experts betg pli als curridurs da vegnir en l'Engiadina in’emna avant la cursa per ch’il corp sa disia vid l’autezza. Il cuntrari è il cas: in’excursiun d’in di bastia tenor els per far in maraton u tut tenor perfin viagiar en Engiadina, currer ils 42,5 kilometers e puspè turnar a chasa il medem di. Il tipic participant dal Maraton da skis engiadinais che passenta almain in’emna en Engiadina, na dettia strusch pli, deplorescha Kasper. Perquai emprov'ins uss puspè da prolungar l’emna da maraton cun novas purschidas.
Sprint da notg resta
Sper la nova «Cursa da notg» suonda il di suenter sco usità il «Sprint da notg» dal Maraton da skis engiadinais, nua che prominents curran in percurs a San Murezzan Bogn il venderdi saira. Las annunzias per questa occurrenza empermettian in grond spectacul, dapli na vul Menduri Kasper dentant betg anc tradir.
RR actualitad 07:00