Siglir tar il cuntegn

Header

cuntegn

Sport da tir Ils giuvens d'ina da las pli veglias uniuns èn ils pli ferms

La gruppa da tir Voluntaria Trun sa mesira la nova stagiun en la liga naziunala B. Cun la buis d'aria sin 10 meters han ils 8 tiradurs sursilvans declassà la concurrenza en il campiunadi d'emprima liga.

Gist anc avant ch'igl è ì da pir en mender cun il coronavirus ha la Voluntaria Trun terminà il campiunadi e dumagnà la promoziun en la liga naziunala B. Quai che sto spetgar è la festa da finiziun e promoziun. Las quater tiraduras ed ils quatter tiradurs che furman l'equipa sursilvana che sajetta cun la buis d'aria sin la distanza da 10 meters ha gì in grondius campiunadi en emprima liga. Tut ils 8 han realisà auts resultats en tut ils duels encunter las set equipas adversarias. A la fin da la stagiun han els pudì nudar il resultat maximal ch'ha muntà la promoziun en la segund auta liga da tir da la Svizra. L'equipa sursilvana è uschia la pli ferma dal Grischun.

audio
La Voluntaria Trun è promovida en liga naziunala B
ord Sportissimo dals 21.03.2020. Maletg: RTR
laschar ir. Durada: 5 minutas 36 Secundas.

Igl è la paja per lavurar e trenar minuzius sur onns. Suenter che l'equipa sursilvana è sa participada 10 onns al campiunadi svizzer davent da la terza liga e plirs onns en segunda liga è tut ì svelt. L'onn passà la promoziun en emprima liga ed uss gia il pass en la liga naziunala B. E betg sco ultim è il success era il merit da Baseli Tomaschett che s'engascha e lavura uss passa 15 onns sco trenader e vegn da gudagnar e fascinar gia ils uffants per il sport da sajettar.

audio
Las equipas da tiradurs han adina avantatg da chasa
ord Sportissimo dals 21.03.2020. Maletg: RTR
laschar ir. Durada: 4 minutas 3 Secundas.

Il settember cumenza lu l'aventura en la liga naziunala B. Quai encunter set equipas da la Svizra orientala. Baseli Tomaschett crai ch'i duess esser pussaivel a la Voluntaria Trun da s'etablir en quella liga. Ambiziuns da perfin ir si en la pli auta liga na saja nagin tema. Fitgà pe e restar en la B saja la finamira.

RTR Sportissimo 12:00

Artitgels legids il pli savens