Che snus è vegnì ils ultims onns pli e pli popular, er tar nus en Svizra è enconuschent. Quai mussan eras las cifras. Il 2018 èn 50 tonnas snus vegnì importà en Svizra, il 2006 era quai mo 2 tonnas. Quai mussan cifras da la Confederaziun. Cifras che mussan che quest tubac è actualmain in zic la droga da moda. Ins auda er magari ch'i saja la droga da sport.
Snus – en ils sports scandinavs populars
Il pli popular è il snus, che vegn mess sut la lef en il hockey sin glatsch ed en il unihockey. Claudio Hagmann da Cuira Unihockey di che radund 1/3 dals giugaders creschids dal club consumeschian snus. Nagin problem saja il consum dentant tar ils giuvens da 16 onns, declera el.
Cuira Unihockey ha reglas strictas quai che pertutga snus. Sin l'areal da dal club, sco en las gardarobas, saja scumandà da consumar snus.
Snus è in tubac en in pitschen plimatsch che vegn mess sut la lef. Oriundamain deriva snus da la Scandinavia (Norvegia, Svezia). Ils ultims onns e decennis ha il product da tubac dentant er chattà pli e pli fitg la via en Svizra. En in plimatsch da snus è tant nicotin sco en trais cigarettas.
Effect sin la prestaziun?
Adina puspè aud'ins che snus augmentia la prestaziun, ch'i fetschia vegnir pli agressiv u ch'ins saja pli attent. Quai na constettia dentant betg dal tut, di Lieni Widmer da grischun sport, ch'è plinavant ambassadur da Cool & Clean. Il snus haja blers effects negativs. El cuntegnia 28 substanzas che sappian provocar cancer (la cigaretta ha 40). Plinavant saja snus er contraproductiv pertutgant il process da recreaziun.
Tenor Lieni Widmer è snus insatge che ha pers nagut en il sport. Sch'ins metta in plimatsch snus sut il lef, saja quai da cumparegliar cun fimar trais cigarettas.
RR actualitad 07:00