Siglir tar il cuntegn

Header

cuntegn

Velo inscuntra biatlon Fabian Cancellara a Lantsch

Quest'emna è la legenda da velo svizra, Fabian Cancellara (39), stada sin visita en l'arena da biatlon a Lantsch. Ensemen cun giuvens talents da la «Swiss Racing Academy» ha el mussà ses talent sco biatlet.

La «Swiss Racing Academy» è in team privat che vegn furmà da giuvens atlets svizzers. Durant las duas ultimas emnas ha l'equipa absolvì in champ da trenament a Lantsch. In punct culminant da quest champ è stà il di cun Fabian Cancellara. Ensemen han els mussà quant ferms ch'els èn cun la buis da sport.

audio
Inscunter cun Fabian Cancellara a Lai
ord Sport ed actualitad dals 11.07.2020.
laschar ir. Durada: 3 minutas 22 Secundas.

Ina variaziun che fa bain

Per ils giuvens atlets ch'èn quasi tuts sut 23 onns èsi stà ina buna variaziun dasper il trot da mintgadi. Malgrà ch'il sport da biatlon n'è insumma betg sumegliant al sport da velo han ils atlets laschà plaschair quest excurs.

Nus trenain uschiglio 7 giadas per emna sin il velo. Perquai fai bain a tuts da far ina giada insatge auter.
Autur: Participant dal champ
Jau na sai betg, sche quai porta insatge a nus per ir cun velo. I fa dentant adina bain da vesair autras chaussas.
Autur: Participant dal champ

Cancellara padrin d'equipa

Er il campiun olimpic e mundial en la cursa cunter l'ura, Fabian Cancellara, ha laschà plaschair il temp en l'arena da biatlon a Lantsch. Biatlon saja in sport che fascineschia el fitg.

Fabian Cancellara

Avrir la box Serrar la box

Il Bernais è sa retratg il 2016 dal sport professiunal. Durant sia carriera ha el gudagnà aur als gieus olimpics 2008 e 2016 en la cursa cunter l'ura. Plinavant è el vegnì quatter giadas campiun mundial.

Ulteriurs success da Cancellara èn stads la victoria dal Tour de Suisse il 2009 u er victorias als classichers sco Paris-Roubaix, Milaun-San Remo u a la cursa da Flandern.

Plinavant è Fabian Cancellara vegnì preschentà sco nov padrin da la «Swiss Racing Academy». El veglia gidar als giuvens atlets da far lur carriera da velo. Ina finamira saja dentant er da sustegnair ils ciclists che na dumognan betg da far il pass tar ils profis.

RTR actualitad e sport 17:00

Artitgels legids il pli savens