Siglir tar il cuntegn
cuntegn

Sport Divers Victoria per il HCD en l'emprim gieu da playoff

Il club da hockey da Tavau ha cumenzà cun ina victoria ils quart-finals dals playoffs da la liga naziunala A.

In giugader da Tavau sajetta sin il gol da Losanna. Il goli da Losanna ed in giugader n'han nagina schanza.
Legenda: Il HCD gudogna l'emprima partida da playoff cunter Losanna. Keystone

Il HCD ha gudagnà l'emprima partida cunter Losanna ordaifer cun 5 a 3. Cumenzà ha la partida però tut auter ch'empermettent per ils Grischuns. Suenter be 17 minutas ha Losanna gia manà cun 3 a 0. Suenter ha Tavau giugà pli concentrà e fatg dus gols en il segund terz. En il terz terz ha il HCD lura fatg anc 3 gols ed uschia gudagnà. Il goli da Tavau Gilles Senn ha tegnì tut ils 23 davos tirs sin ses gol e cunquai fatg bun il cumenzament malgartegià.

En tschellas partidas dals quart-finals dals playoffs ha Berna gudagnà cunter Bienna cun 2 ad 1 suenter prolungaziun. Zug ha gudagnà cunter Genevra cun 3 a 2 suenter prolungaziun ed ils ZSC Lions han battì Lugano cun 4 a 3.

RR Novitads 23:00