Siglir tar il cuntegn

Header

William Reais durant ina cursa.
Legenda: Pir cun 16 onns ha il giuven da Cuira cumenzà cun il sport d'atletica leva. Keystone
cuntegn

William Reais Il pli spert Grischun

William Reais da Cuira tutga tar las pli spertas persunas en Svizra. Quai malgrà ch'il giuven da 21 onns ha pir cumenzà avant intgins onns cun il sport d'aletica leva.

Ils temps da William Reais persvadan:

  • 100 m - 10.35 secundas
  • 200 m - 20.24 secundas

Cun quests temps tutga il giuven da Cuira tar ils megliers sprinters da la Svizra. Avant bun in'emna è el vegnì campiun svizzer en la cursa sur 200 meters. Per el èsi dentant cler: El vul, baud u tard, era far furora sin palc internaziunal.

Per l'onn proxim ha William Reais la finamira da far ina medaglia al campiunadi d'Europa sut 23 onns. E plinavant vul el era dumagnar la qualificaziun per ils gieus olimpics a Tokio.

Pir cun 16 onns vegnì tar l'atletica leva

Cumenzà a far cursas da sprint ha l'atlet da Cuira, cun ragischs en il Portugal ed en l'Angola, tard. Sco giuven haja el ditg dà ballape a Cuira. Grazia ad ina collega saja el lura vegnì tar il sport d'atletica leva. E fin oz è el stà fidaivel al sport, almain a las disciplinas da sprint.

Tut quai ch'jau fatsch, fatsch jau spert. Saja quai currer u era discurrer.
Autur: William Reais

William Reais è pertschert ch'el sa anc vegnir pli spert. Spezialmain la partenza saja anc ina gronda flaivlezza dad el. Tar ina cursa sur 100 u 200 meters è la partenza insatge dal pli impurtant.

William Reais
Legenda: L'ultim temp ha William Reais pulverisà pliras giadas ses agens records. Keystone

Trenament a Turitg

Per cuntanscher sias finamiras investescha l'atlet bler. Tschintg fin sis giadas ad emna va el da Cuira a Turitg per trenar. Là sajan las cundiziuns da trenament meglras. Plinavant lavura el parzialmain tar ina banca a Cuira.

William Reais viva pia ina vita intensiva per cuntanscher ses siemis. Sias grondas finamiras èn da gudagnar medaglias a concurrenzas internaziunalas e da dumagnar in di ils 200 meters sut 20 secundas.

Buns atlets dal Grischun hai adina puspè dà ils ultims decennis. Noss redactur Gian Carlo Candinas cun ina survista.

100 e 200 meters

Usain Bolt
Legenda:Keystone

En las disciplinas da 100 e 200 meters è Usain Bolt il pli grond atlet da tut il temp. Ses records da 9.58 sur 100 meters e 19.19 sur 200 meters èn records per l'eternitad.

Il Giamaican ha durant sia carriera gudagnà 8 medaglias dad aur a gieus olimpics ed 11 dad aur a campiunadis mundials.

Il 2017 è Usain Bolt sa retratgs dal sport activ.

RTR actualitad 07:00

Artitgels legids il pli savens

Scrollar a sanestra Scrollar a dretga