Mintg’onn da sport ha ses puncts fix. Cursas da skis legendaras, turniers da tennis, la Champions League da ballape ni il campiunadi mundial da hockey. Occurenzzas che procuran mintg’onn puspè per emoziuns.
Occurrenzas betg annualas
Spezialmain quest'enviern dastgan ils fans sa legrar sin inqual punct culminant en il mund dal sport.
- Campiunadis mundials da skis alpin: A Courchevel e Méribel en Frantscha han lieu dals 6 fin ils 19 da favrer ils campiunadis mundials da skis alpin. Cun Marco Odermatt, Wendy Holdener ni er Lara Gut-Behrami ha la Svizra inqual trumf che po far furora.
- Campiunadi mundial da biatlon: Parallel a skiunzas e skiunzs alpins èn era biatlets e biatletas en acziun al campiunadi mundial. Ad Oberhof en Germania vegn ì dals 8 fin ils 19 da favrer a la chatscha da medaglias.
- Campiunadi mundial ski nordic: A la fin da la stagiun d'enviern cumbattan era anc skiunz e skiunzas dal sport nordic per medaglias al campiunadi mundial. A Planica en Slovenia vegni cumbattì dals 22 da favrer fin ils 5 da mars per las medaglias. Per l'emprima giada dapi il 2007 vegni ad esser in campiunadi mundial senza Dario Cologna.
- Campiunadi mundial da ballape da dunnas: Las meglieras naziuns cumbattan dals 20 da fanadur fin 20 d'avust en l'Australia ed en la Nova Zelanda per il titel. Da la partida è er la Svizra, eventualmain er cun las duas golias grischunas Livia Peng e Seraina Friedli. En la fasa da gruppa frunta la Svizra sin la Nova Zelanda, la Norvegia e las Filippinas.