Siglir tar il cuntegn

Ski nordic Falun 2015 Falun, in lieu en Dalarna

La citad da Falun è la chapitala da la provinza Dalarna en la Svezia centrala, 222 kilometers davent da la chapitala svedaisa Stockholm. Falun ha 56’000 abitants ed è 107 meters sur mar.

Ina chasa en il guaud invernal.
Legenda: CC BY-NC-SA 2.0; Falun 2015

Las anteriuras minieras d’arom ed il quartier da lavurers a Falun èn patrimoni cultural mundial da l’UNESCO. Ord l’arom da las minieras vegn anc oz producida la colur tipica per las chasas da lain svedaisas, il cotschen da Falun, “Faluröd”.

Simbol da la regiun Dalarna èn ils chavals da lain cotschens cun musters tradiziunals, ils chavals da Dala, “Dalahäst”. Falun è il center svedais da passlung ed organisescha gia per la quarta giada campiunadis mundials da ski nordic.