Al sprint a Lathi en la Finlanda è Valerio Grond vegnì sin il terz plaz. Quai è l'emprima plazza da podest insumma per l'atlet da Tavau en la cuppa mundiala. Gudagnà ha il sprint en il stil da skating Johannes Kläbo, avant il Franzos Lucas Chanavat. Encunter quels dus favurits n'ha Grond betg gì ina schanza. Il rest da la concurrenza ha el dentant pudì distanziar cun parter en bain las forzas e la finala augmentar il tempo en il final. Uschia ha Valerio Grond surpassà il Norvegiais Even Northug ed il Talian Federico Pellegrino.
Quarta giada en il final – emprim podest
Quest enviern è Valerio Grond stà diversas giadas en il final. Enfin ussa era el daventà duas giadas 5avel ed ina giada quart, quai en la cursa da cuppa mundiala en il Vallais. Ussa èsi reussì al giuven da 23 onns da cumbatter per las plazzas davantiers ed ha uschia dumagnà il sigl sin il podest.
