Siglir tar il cuntegn

Header

cuntegn

Sprint umens e dunnas Nadine Fähndrich: «Tut auter ch’ina medaglia fiss ina trumpada»

Ils campiunadis mundials da ski nordic ad Oberstdorf cumenzan la gievgia cun las cursas da sprint en il stil classic. Sin in exploit dastgan er las duas svizras, Nadine Fähndrich e Laurien van der Graaff, sperar.

video
Quai di Nadine Fähndrich avant las emprimas cursas
Or da Sport-Clip dals 23.02.2021.
laschar ir

Las duas spezialistas da sprint miran dentant gia enavant sin il sprint d’equipa da dumengia, ils 28 da favrer. En questa cursa ha la Svizra la pli gronda schanza da gudagnar ina medaglia. En ils davos quatter sprints d’equipa da las dunnas dals davos dus onns èn Fähndrich e van der Graaff mintgamai curridas sin il podest (plazs 3, 2, 1 e 3). Las ambiziuns al punct culminant da la stagiun èn uschia grondas, era per Nadine Fähndrich: «Tut auter ch’ina medaglia fiss ina trumpada.» Tenor Laurien van der Graaff vegnan sis naziuns a cumbatter per las medaglias.

video
Van der Graaff: «La finamira è il mezfinal»
Or da Sport-Clip dals 23.02.2021.
laschar ir

Hediger en buna furma

Betg uschè grondas èn las ambiziuns tar ils umens, er sche Jovian Hediger e Roman Furger han dacurt persvadì ad Ulricehamn cun il segund plaz. En la cursa singula da sprint parta Hediger sco il grond trumf svizzer. A Kuusamo, cura che tuts ils spezialists da sprint eran a la partenza, aveva il svizzer da 30 onns oriunds da Bex persvadì cun il 6avel plaz.

video
Jovian Hediger avant ils campiunadis mundials
Or da Sport-Clip dals 23.02.2021.
laschar ir

Quartfinals sco finamira

Dasper Jovian Hediger parta er ses cusrin Erwan Käser a la cursa da sprint. Plinavant ha Swiss Ski nominà Roman Schaad ed Valerio Grond da Tavau per questa cursa. La finamira minimala da tuts è d’almain cuntanscher ils quartfinals.

Ils finals da las cursas da sprint da las dunnas e dals umens cumenzan a partir da las 11:30 uras. Currì vegn mintgamai en il stil classic.

RTR Actualitad 11:00

Artitgels legids il pli savens

Scrollar a sanestra Scrollar a dretga