Siglir tar il cuntegn

Header

cuntegn

Staffetta da las dunnas Passlunghistas svizras vegnan 7avlas

Il quartet svizzer cun Laurien van der Graaff, Nadine Fähndrich, Lydia Hiernickel ed Alina Meier han mussà ina stupenta prestaziun en la staffetta. La finala han ellas pers strusch trais minutas sin las grondas favuritas, il quartet da la Norvegia che gudogna aur avant la Russia e la Finlanda.

video
Las Norvegiaisas gudognan puspè aur
Or da Sport-Clip dals 04.03.2021.
laschar ir

La dominanza norvegiaisa cuntinuescha tar ils campiunadis mundials ad Oberstdorf. Las Norvegiaisas cun Tiril Weng, Heidi Weng, Therese Johaug e la giuvna Helene Marie Fossesholm han gudagnà cleramain la cursa da staffetta (2 giadas 5 km classic + 2 giadas 5 km skating). La finala han ellas battì las Russas per 26,6 secundas. La medaglia da bronz gudognan las Finlandaisas (+ 46,2 secundas) ch'han battì en in sprint final las Americanas.

video
Van der Graaff: «Ins cumbatta per l'entir team»
Or da Sport-Clip dals 04.03.2021.
laschar ir

Svizras ditg en il cumbat per medaglias

Il quartet svizzer ha ditg dastgà siemiar d'ina medaglia. Suenter che Laurien van der Graaff e Nadine Fähndrich èn curridas en il stil classic sa chattava la Svizra sin plaz 5, paucas secundas davos in plaz da podest. Las duas giuvnas Lydia Hiernickel ed Alina Meier han en il stil liber però anc pers temp ed intginas posiziuns. Cun quest 7avel plaz han las Svizras dentant cuntanschì lur finamira.

video
Charlotte Kalla na vegn betg sin turas
Or da Sport-Clip dals 04.03.2021.
laschar ir

Dischillusiun e larmas tar la Svezia

Cun grondas aspectativas è il quartet svedais partì en questa cursa. La finala han las defensuras dal titel stuì magunar ina dira terrada, era perquai ch'il material n'ha betg funcziunà – quai principalmain durant las emprimas duas rundas en il stil classic. Enstagl da defender il titel da Seefeld 2019 u almain gudagnar ina medaglia, han las Svedaisas stuì sa cuntentar cun il 6avel plaz.

RTR Actualitad 17:00

Artitgels legids il pli savens

Scrollar a sanestra Scrollar a dretga