Siglir tar il cuntegn

Header

cuntegn

Start en il Tirol Stagiun da skis cumenza a Sölden

Culp da partenza en la nova stagiun da skis. Tradiziunalmain è quel adina sin il glatscher da Sölden en il Tirol. L’emprima cursa da la stagiun è l’emprim test per skiunzas e skiunzs suenter blers mais da preparaziun. Suenter las cursas san ins sche la preparaziun e stada buna u betg.

Dapi passa 20 onns datti adina l'october las emprimas cursas da la cuppa mundiala da skis a Sölden en il Tirol. Sin il Rettenbachgletscher succeda lura il culp da partenza en la nova stagiun da skis. Suenter las emprimas cursas san las skiunzas ed ils skiunzs nua ch'i stattan e co che la furma sa preschenta. Las cursas a Sölden han ina lunga tradiziun e marcheschan il start en la stagiun da skis. Er quest enviern puspè cun ina occurrenza gronda en il program. In favrer da l’onn proxim spetgan ils campiunadis mundials da skis alpin a Courchevel/Méribel en Frantscha.

audio
Sölden: Situaziun da partenza generala
ord Actualitad dals 19.10.2022.
laschar ir. Durada: 4 minutas 8 Secundas.
En l’equipa avain nus ina stupenta pussaivladad da congual cun Marco Odermatt.
Autur: Gino Caviezel skiunz grischun

Odermatt e Gisin ils leaders svizzers

Gia l'entschatta da la nova stagiun èsi da far quint cun il defensur dal titel e victur dal classament general Marco Odermatt. Il meglier skiunz da la stagiun passada ha pudì trenar durant la stad senza problems. Odermatt è fit e sa legra sin la nova stagiun. Il medem vala er per Michelle Gisin. Er ella ha pudì sa recrear bain da la stagiun passada ed è pronta per il nov enviern. Sper ils dus leaders da l’equipa da slalom gigant vulan er ils grischuns far il proxim pass. Gino Caviezel da Lai è il pli datiers a las plazzas da podest. A Sölden ha Caviezel cuntanschì fin da qua ses megliers resultats. Avant dus onns è el vegnì terz.

audio
Sölden: Gino Caviezel è pront per la nova stagiun
ord Actualitad dals 19.10.2022. Bild: RTR, Roman Dobler
laschar ir. Durada: 3 minutas 4 Secundas.

Daniele Sette e Thomas Tumler vulan far il proxim pass

L’emprima cursa da la stagiun a Sölden è era adina stada ina buna cursa per Daniele Sette. Il skiunz da San Murezzan, ch’è pir dapi trais onns en in cader da Swiss Ski, ha mussà en il Tirol ed ad Adelboden sias meglras prestaziuns. Che tut funcziuna gia tar l’emprima cursa da la stagiun è impurtant. Lura san ins che la partenza en la nova stagiun e gartegiada. Sin ina buna partenza spera er Thomas Tumler da Samignun. El ha festivà avant 10 onns sia premiera en la cuppa mundiala da skis a Sölden. Uss, 10 onns pli tard e suenter ina greva ferida dal dies, emprova el da turnar puspè a la veglia furma.

audio
Sölden: Daniele Sette e Thomas Tumler vulan far proxim pass
ord Actualitad dals 19.10.2022. Bild: RTR, Roman Dobler
laschar ir. Durada: 3 minutas 3 Secundas.

Or da l'archiv

Il trenament per la stagiun da skis avant 30 onns.

video
Trenament da preparaziun per la stagiun da skis 92/93
Or da Telesguard dals 21.11.1992.
laschar ir. Durada: 8 minutas 12 Secundas.

RTR actualitad 07:00

Artitgels legids il pli savens

Scrollar a sanestra Scrollar a dretga