Dapi blers onns è il culp da partenza en la nova stagiun da skis a Sölden. Sin il glatscher da Rettenbach sur Sölden datti las emprimas duas cursas da la stagiun. La partenza en la nova stagiun cumenza en la disciplina da basa dal sport da skis – en il slalom gigant.
Marco Odermatt il meglier skiunz dal mund
Gia duas giadas ha Marco Odermatt gudagnà la cuppa mundiala generala da skis. Era duas giadas ha Odermatt gia gudagnà a Sölden. Uschia pon ins segir dir che Odermatt ha mess durant las duas davosas stagiuns la basa per ses success – gia tar l’emprima cursa da la stagiun, tar il slalom gigant da Sölden. Sch'in skiunz è en furma gia al principi da la nova stagiun, alura procura quai per fidanza en sai. Ed i mussa a l'atlet ch'el ha fatg bler endretg durant ils mais da preparaziun la stad.
Sper Marco Odermatt èn segir era Loïc Meillard ed il Grischun Gino Caviezel ils pli gronds trumfs da l’equipa svizra. Omadus han gia mussà bunas prestaziuns a Sölden. Gino Caviezel per exempel è vegnì segund avant trais onns, e quart avant dus onns. Per el cumenza questa nova stagiun cun in novum. Per l’emprima giada è Gino Caviezel sa preparà senza ses frar Mauro sin la nova stagiun da skis.
Livio Simonet vul confermar sia buna davosa stagiun
Il skiunz da 25 onns ha fatg sias emprimas experientschas en la cuppa mundiala da skis la stagiun passada. Gist tar las occurrenzas d’equipa ha el mussà fitg bunas prestaziuns. A la fin da la stagiun a Soldeu è Livio Simonet vegnì cun l'equipa svizra segund. Grazia a las bunas prestaziuns da la stagiun passada ha il skiunz da Casti survegnì ina plazza da partenza fixa en la cuppa mundiala da skis. Quella plazza da partenza vul Simonet confermar cun buns resultats.
Selina Egloff, il talent che ha fatg pausa
Gia baud era la giuvna skiunza Selina Egloff da Scuol ferma sin ils skis. Spert ha ella gudagnà cursas regiunalas, e via quellas è ella vegnida en la Federaziun grischuna da skis e pli tard en ils caders da Swiss Ski. Gia cun 18 onns ha ella pudì ir a Levi per l’emprima giada a la partenza dad ina cursa da la cuppa mundiala.
Lura dentant ha la carriera da Selina Egloff cumenzà da stagnar. Avant in onn e mez ha ella ditg che las battarias sajan vitas, vitas pervia dal sport da prestaziun. Perquai ha ella fatg durant in'entira stagiun pausa. Ella ha fatg autras chaussas, ed ha cumenzà cun il studi da magistra a la Scola auta da pedagogia dal Grischun. Uss suenter sia pausa dal sport da skis emprova ella da turnar. Via cursas da la cuppa europeica vul ella puspè s'avischinar al livel dad ina giada.
