La sisavla victoria en la lutga da primavaira n'è mai propi stada en privel. Suenter la mesadad ha bain Reto Koch manà il classament cun ils puncts maximals, ma er Orlik aveva fin là gudagnà tut sias lutgas, n'ha dentant betg pudì far tut ils puncts. En la quarta lutga è lura crudada la decisiun gia anticipadamain. Koch ed Orlik èn fruntads in sin l'auter. Suenter radund duas minutas ha Koch dentant pers. In'ulteriura victoria svelta encunter Patrick Schmid ha lura garantì ad Orlik la lutga finala.
En quella è Orlik fruntà sin Roger Rychen. Il Glarunais da 31 onns aveva pers sia emprima lutga ed è lura sa cumbattì cun quatter victorias enavant. Perquai che Rychen aveva battì durant la festa er Roman Hochholdinger, ha Rychen lura pudì ir en la lutga finala, perquai ch'els dus han gì tuttina blers puncts.
En la lutga finala ha Armon Orlik attatgà immediat e lura mess Rychen gia suenter 15 secundas en il resgim. El ha curt stuì smatgar anc ina giada e lura è la lutga stada a fin.
Lutga ha cumenzà sut tschiel avert
La lutga da primavaira ch’è adina durant l’avrigl è per ils lutgaders grischuns il culp da partenza en la nova stagiun sut tschiel avert. Er sch'ils lutgaders grischuns han gia fatg part ad ina u a l’autra lutga en halla è la lutga da primavaira il culp da partenza en la stagiun. La lutga da primavaira ha gì lieu quest on a Vaz Sut ed ella è vegnida organisada dal Club da lutga d'Unterlandquart, la patria dal meglier lutgader grischun Armon Orlik.
Armon Orlik è stà il grond favurit
Gia tschintg giadas aveva Armon Orlik gudagnà la lutga da primavaira. Uss ha el gudagnà quella per la sisavla giada. La lutga da primavaira è l’emprim test da la stagiun. Suenter las emprimas lutgas san ins exact nua ch'ins stat. Sper Armon Orlik ha la scena er guardà sin la furma da Christian Biäsch da Tavau Sertig. Lez ha mussà ina ferma prestaziun ed è la finala vegnì segund. El ha pudì festivar tschintg victorias. Sia suletta terrada ha el gì cunter Urs Doppmann.
Er ulteriurs Grischuns han persvas
Ma er ulteriurs Grischuns han mussà bunas prestaziuns. Uschia Niklas Lötscher e Fabio Castelli. Els han persvas. Lötscher, da Vaz Sut è stà Sonda gia il victur da la pli veglia categoria dals lutgaders da la nova generaziun. Dumengia è el sa classà cun quatter vicrorias sin il tschintgavel plaz, cun tuttina blers puncts sco ses collega da team Fabio Castelli. Er el ha decidì quatter lutgas per el. Ils dus frars da Domat, Marc e Corsin Jörger han gì mintgamai trais victorias ed èn uschia vegnids otgavels.
Emprim test suenter bleras uras da trenament
Dapi il november èn ils lutgaders grischuns en il trenament. Er sch'igl ha gia dà ina u l’autra festa da lutga è la lutga da primavaira l’emprima sut tschiel avert e l’emprim test da la stagiun. Ina stagiun ch’è er quest onn puspè speziala. L'avust spetga il punct culminant da questa stagiun, la festa da lutga dad Unspunnen. Quai è ina festa cun caracter federal, la festa dad Unspunnen ha lieu be mintga sis onns.
