Las cursas dal campiunadi svizzer da passlung a Sedrun la fin da mars e gist suenter anc quellas a Langis eran las davosas dad Anja Lozza sin quest nivel. La curridura da Zuoz ha gia avant decidì da terminar sia carriera activa e da sa concentrar sin il studi da biologia a l’Universitad da Turitg. E quai cun be 20 onns.
Studi da biologia a Turitg
En il futur sa concentrescha Anja Lozza uss sin ses studi da biologia a l’Universitad da Turitg. Damai che quest studi pretenda bler engaschament e blera lavur pratica en il labor, na sa cunfetschia quai betg cun il sport professiunal. Perquai ha ella er gia decidì durant la stagiun passada da terminar la carriera a favur dal studi. Auters interess sper il studi restan per Anja Lozza era il dissegnar e fotografar. Il pli gugent en il Parc Naziunal Svizzer gist davant sia porta chasa.
Campiunessa mundiala cun la staffetta U23
Il pli grond success ha la giuvna passlungista festivà la stagiun passada en la categoria da junioras e tar la FIS. Qua ha ella pudì festivar inqual success.
Il punct culminant è però stà tar ils campiunadis mundials da juniors ad Oberwiesenthal en Germania, l'onn passà. Là ha Anja Lozza gudagnà en la staffetta la medaglia d'aur, ensemen cun Nadja Kälin, Anja Weber e Siri Wigger ha ella procurà per la gronda surpaisa e gudagnà il titel. In ulteriur punct marcant en sia carriera era la partenza a las cursas da la cuppa mundiala da passlung, Tavau Nordic, en sia stretga patria.