Siglir tar il cuntegn

Header

audio
Guido Tognoni sa regorda da Pelé
Or da Actualitad dals 30.12.2022. Maletg: RTR
laschar ir. Durada: 2 minutas 55 Secundas.
cuntegn

Suenter la mort da Pelé Guido Tognoni: «Jau sun stà in ami da Pelé»

Pelé è mort en la vegliadetgna dad 82 onns suenter avair patì da cancer. Las ultimas emnas ès el vegnì tractà a moda palliativa. Ina persuna ch'ha enconuschì persunalmain la legenda dal ballape è Guido Tognoni. Lez tradescha anecdotas da l'um ch'è daventà sco sulet trais giadas campiun mundial.

Cura che Pelé ha gudagnà ils titels da campiun mundial era Guido Tognoni anc in uffant. L’Engiadinais ch’è radund 10 onns pli giuven sa regorda dals trics ch'il Brasilian fascheva cun la balla. Decennis pli tard ha Guido Tognoni emprendì d’enconuscher persunalmain la legenda da ballape ch’el aveva d’uffant vis en la televisiun e la gasetta. El descriva Pelé sco persuna tut normala ma er extraordinari modesta.

Ina persunalitad da l’istorgia contemporana uschè modesta stos ir a tschertgar. Quai na chattan ins betg pli.
Autur: Guido Tognoni anteriur schef da pressa da la FIFA

Pelé haja adina prendì peda ed ins haja pudì discurrer cun el davart tut. E Tognoni ha sentì sez che Pelé sa mussava er engraziaivel. Suenter ch’el haja intermedià e mess fil en guglia per in contract da marketing haja el retschavì in spezial regal da Pelé, numnadamain ina ura cun ina dedicaziun persunala. «Para o meu Guido de Pelé». 

Quai è il pli bel regal ch’jau hai survegnì en mia vita dal sport.
Autur: Guido Tognoni anteriur schef da pressa da la FIFA

La carriera

Pelé ha giugà bunamain tut sia carriera per il FC Santos, il club da la citad da port Santos datiers da São Paulo – da 1956 fin 1974. Suenter è el anc stà activ trais stagiuns tar il club american New York Cosmos. Cun il FC Santos ha Pelé gudagnà tranter auter 26 titels naziunals, ina giada la cuppa mundiala e duas giadas la Copa Libertadores, la cuppa sidamericana.

Ils success ils pli enconuschents ha Pelé cuntanschì cun la squadra naziunala brasiliana. Il 1958 en la Svezia, il 1962 en il Chile ed il 1970 en il Mexico ha Pelé manà la «Seleção» a trais triumfs als campiunadis mundials. El è fin oz il sulet giugader ch'è daventà trais giadas campiun mundial. Tar il final 1970, che la Brasilia ha gudagnà cun 4:1 cunter l'Italia – ha Pelé marcà il 1:0. Igl è stà ses 12avel e davos gol tar in turnier da campiunadi mundial. L'onn 1971 è el lura sa retratg da la squadra naziunala.

video
L'onn 1958 al campiunadi mundial ha il mund emprendì d'enconuscher Pelé
Or da Sport-Clip dals 29.12.2022.
laschar ir. Durada: 1 minuta 5 Secundas.

RTR novitads 21:00

Artitgels legids il pli savens