En il segund super-g a Zauchensee n'è Lara Gut-Behrami betg stada da franar. Ella gudogna uschia sia 40avla cursa da la cuppa mundiala e terminescha uschia la fin d'emna en l'Austria a moda perfetga.
Il podest:
- Lara Gut-Behrami (SUI) 1:14,98 minutas
- Cornelia Hütter (AUT) +0,25 sec.
- Mirjam Puchner (AUT) +0,26 sec.
Per Lara Gut-Behrami, anc terza en l'emprim super-g a Zauchensee il venderdi, èsi però l'emprima victoria en questa stagiun en sia disciplina da parada. Cun sia 40avla victoria en la cuppa mundiala ha ella uss triumfà tantas giadas sco Pirmin Zurbriggen tar ils umens. Sulet Vreni Schneider è anc stada pli savens sisum il podest, numnadamain 55 giadas.
Las skiunzas svizras cun buna prestaziun d'equipa
Davos Lara Gut-Behrami ha er Michelle Gisin persvadì. Ella è vegnida 5avla ed uschia manchentà be per 9 tschientavels in plaz sin il podest. Cun Corinne Suter, il di avant anc crudada ora en la cursa rapida, è anc in'ulteriura svizra classada sut las top 15.
Cletg en il discletg ha gì Jasmine Flury. La Grischuna e campiunessa mundiala da la cursa rapida è cupitgada, quai cun buns temps intermediars. La skiunza da Tavau Monstein n'è dentant betg sa blessada.
Ils resultats da las Svizras:
5. Michelle Gisin +0,35 sec.
13. Corinne Suter +0,68 sec.
16. Jasmina Suter +0,76 sec.
20. Delia Durrer +1,05 sec.
24. Priska Nufer +1,31 sec.
26. Joana Hählen +1,34 sec.
