Las skiunzas svizras n'han betg pudì persvader en il super-G da dumengia a Garmisch-Patenkirchen. Meglra Svizra è Jasmina Suter sco 7avla. Gudagnà han la Taliana Federica Brignone e l’Austriaca Cornelia Hütter – ch'han medemamain gì il medem temp. Tamara Tippler da l'Austria cumplettescha il podest.
Il podest
- 1. Federica Brignone (ITA) e Cornelia Hütter (AUT), 1:18,19 minutas
- 3. Tamara Trippler, +0,82 secundas
Sco schon tar la cursa aval da la sonda, han er tar il super-G mancà intginas da las top-atletas. Lara Gut-Behrami, Michelle Gisin sco era Sofia Goggia, Mikaela Shiffrin ubain Ragnhild Mowinckel n'èn betg partidas.
Las prestaziuns da las Svizras
- 7. Jasmina Suter, +1,01 secundas
- 8. Joana Hählen e Corinne Suter, +1,03
- 15. Noémie Kolly, +1,60
- 22. Jasmine Flury, +1,78
- 28. Prisca Nufer, +2,10
- 37. Stephanie Jenal, +2,78
Pausa da quatter emnas
Cun la cursa dad oz va la cuppa mundiala da skis en ina pausa da quatter emnas. A partir da l'emna proxima stattan ils gieus olimpics a Peking sin il program. Las proximas cursas da la cuppa mundiala datti la fin da favrer a Crans-Montana.