La Tessinaisa Lara Gut-Behrami ha gudagnà il super-G a Kvitfjell en Norvegia. Igl è la terza victoria per ella en questa disciplina, questa stagiun. Davos ella è sa classada sia pli gronda concurrenta per la culla pitschna, Cornelia Hütter.
Il podest
- Lara Gut-Behrami SUI 1:33,52
- Cornelia Hütter AUT +0,12
- Mirjam Puchner AUT +0,13
Lara Gut-Behrami maina en il classament dal super-G cun 460 puncts avant Cornelia Hütter cun 435 puncts. Dumengia è gia il proxim super-G, era a Kvitfjell. E la davosa schanza per puncts datti alura a Saalbach, venderdi ils 22 da mars.
Pass vers classament general
La victoria da Lara Gut-Behrami è er in ulteriur pass per gudagnar la culla da cristagl gronda per il classament general. Cun quests 100 puncts maina l'atleta da Swiss Ski cun 305 puncts avant l'Americana Mikaela Shiffrin che è anc blessada. Er a la cursa da damaun vegn Shiffrin betg a sa participar. Uschia che Gut-Behrami ha la pussaivladad da bajegiar or vinavant ses avantatg.
Rest da l'equipa n'ha betg pudì tegnair pitg a Gut-Behrami
Las ulteriuras Svizras n'han betg mussà ina buna prestaziun.
- 21. Delia Durrer +1,93
- 25. Jasmina Suter +2,04
- 29. Priska Nufer +2,40
- 33. Michelle Gisin +2,73
- 35. Stephanie Jenal +2,90
- 40. Noémie Kolly +3,45