En il davos super-G da la stagiun han ils atlets svizzers anc ina giada mussà lur classa. Stefan Rogentin po festivar sia emprima victoria en la cuppa mundiala. Il Grischun ha gudagnà cun 3 tschientavels avantatg sin Loïc Meillard. Cumplettà il podest svizzer ha Arnaud Boisset. Era el ha pers be pauc sin Rogentin, numnadamain 15 tschientavels.
Quai è pir la segunda victoria traidubla tar ils umens en in super-G da la cuppa mundiala. La davosa giada hai dà ina victoria traidubla svizra l'onn 1992. Anc megliers eran ils Svizzers be ina giada: L'onn 1982 tar l'emprim super-G da la cuppa mundiala insuma. Lura eran gist tschintg Svizzers sin ils emprims tschintg plazs.
Il matadur da la stagiun, Marco Odermatt, è vegnì 5avel ed ha cunquai gudagnà la culla en la disziplina dal super-G. Per Odermatt è quai gia la terza culla questa stagiun. Segund en la rangaziun generala dal super-G è vegnì l'Austriac Vincent Kriechmayer.
Era tranter ils megliers 10 è il segund Grischun Gino Caviezel. El è vegnì 8avel. Franjo von Allmen è vegnì 16avel, Justin Murisier 18avel.
Il podest:
- Stefan Rogentin (SUI) 1:13.36
- Loic Meillard (SUI) + 0.03
- Arnaud Boisset (SUI) + 0.15
Ils ulteriurs Svizzers:
- 5. Marco Odermatt
- 8. Gino Caviezel
- 16. Franjo von Allmen
- 18. Justin Murisier