Siglir tar il cuntegn

Header

video
Trenader da Cuira, Simon Zopf: «Nus eran adina in pass davos en»
Or da Sport-Clip dals 23.04.2022.
abspielen. Laufzeit 1 minuta 25 Sekunden.
cuntegn

Superfinal unihoc Dira terrada per Piranha Cuira – il buccal resta a Turitg

En il final per il titel da campiunessas svizras d'unihoc hai dà il proxim duel tranter las rivalas eternas da Piranha Cuira e Kloten-Dietlikon. Las Turitgaisas sco defensuras dal titel han ademplì cleramain lur rolla da favuritas, n'han laschà a Cuira nagina schanza e gudagnà cun 9:0.

Il duel per il titel da campiunessas svizra d'unihoc tranter Piranha Cuira e Kloten-Dietlikon hai dà en seria sur blers onns. Otg giadas tranter ils onns 2012 e 2019. L'ultim triumf da l'equipa grischuna datescha da l'onn 2018. Kloten-Dietlikon èn idas sco defensuras dal titel ed era favuritas en il gieu suenter ch'ellas han dominà la qualificaziun ed èn marschadas tras las serias da quart- e mezfinal dals playoffs senza perder in gieu.

Atgnamein han ins spetgà in pli stretg gieu. Tant pli che durant la fasa da qualificaziun èn las dunnas da Cuira vegnidas da batter las Turitgaisas. Quellas han però mussà lur dominanza er en il superfinal e quai a moda fitg clera. A Piranha Cuira n'è gnanc in punct gartegià. Il 0:9 è ina ferma terrada e trumpada per las dunnas da Cuira. Sco il trenader, Simon Zopf, ha ditg gist suenter il gieu, hajan las Turitgaisas tratg atras lur gieu ed els na sajan simplamain betg vegnids da mussar il gieu ch'ins haja bajegià si durant ils playoffs. Per Kloten-Dietlikon èsi uschia il terz titel da campiunessas svizras en roda ed il 9avel en lur istorgia.

Piranha ha gì ina stagiun difficila

Suenter che numerusas giugadras rutinadas han chalà u bandunà il club, ha la nova stagiun cumenzà cun in'equipa pulit giuvna che dovra ses temp per madirar. Plinavant ha la stagiun cumenzà cun il nov duo da trenaders scandinavs Mikael Fernström e Jani Westerlund. Quels han bandunà Piranha Cuira suenter la fasa da qualificaziun ch'il club ha terminà sin posiziun 3. Il favrer han Simon Zopf, il trenader da las U21 da Piranha ed il schef da sport Daniel Darms surpiglià.

audio
Piranha Cuira avant il superfinal
aus Actualitad vom 19.04.2022.
abspielen. Laufzeit 3 minutas 23 Sekunden.

Per Simon Zopf ch'era gia pledà sco nov trenader sin la stagiun 2022/23, ha sia nova incarica a la banda cumenzà pli baud che pensà e gist en la fasa intensiva cun las serias da playoff. Er sch'ils gieus èn savens stads stretgs e las Piranhas han duvrà mintgamai sis gieus en las serias da quart- e mezfinal per vegnir en il superfinal, saja quel merità. Er sche l'experientscha manca per part a l'equipa giuvna, la qualitad constettia, di il nov a la banda.

Onn Campiunessas Vicecampiunessas
2022 Kloten-Dietlikon Piranha Cuira
2019 Kloten-Dietlikon Piranha Cuira
2018 Piranha Cuira Kloten-Dietlikon
2017 Kloten-Dietlikon Piranha Cuira
2016 Piranha Cuira Kloten-Dietlikon
2015 Piranha Cuira Kloten-Dietlikon
2014 Piranha Cuira Kloten-Dietlikon
2013 Piranha Cuira Kloten-Dietlikon
2012 Piranha Cuira Kloten-Dietlikon
2011 Rychenberg Winterthur Piranha Cuira
2010 Piranha Cuira Rychenberg Winterthur
2008 Kloten-Dietlikon Piranha Cuira
2003 Kloten-Dietlikon Piranha Cuira

RTR actualitad 12:00 / novitads 15:00

Artitgels legids il pli savens

Scrollar a sanestra Scrollar a dretga