Siglir tar il cuntegn

Header

video
Il gol decisiv dad Embolo en la 48avla minuta.
Or da FIFA WM 2022 dals 24.11.2022.
laschar ir. Durada: 58 Secundas.
cuntegn

Svizra – Camerun Entschatta gartegiada: Svizra gudogna cun 1:0

En l’emprim gieu da gruppa han ils Svizzers battì il Camerun cun 1:0. Gist Breel Embolo, ch'è naschì en il Camerun, ha fatg l'unic gol dal gieu en la 48avla minuta.

audio
Qatar 2022: Svizra gudogna encunter il Camerun 1:0
ord Actualitad dals 24.11.2022.
laschar ir. Durada: 2 minutas 36 Secundas.

Suenter in'emprima mesadad dal gieu cun pliras schanzas per il Camerun ha Breel Embolo tutgà il gol suenter in bel assist da Xherdan Shaqiri. Il gieu è dentant restà plain tensiun fin la fin. Il Svizzers n'èn betg stads buns da trair a niz lur grondas schanzas. Ina defensiva solida en la segunda mesadad ha dentant garantì la victoria.

video
Resumaziun da la partida Svizra – Camerun
Or da FIFA WM 2022 dals 24.11.2022.
laschar ir. Durada: 5 minutas 31 Secundas.

Questa saira gioga la Brasilia cunter la Serbia en la Gruppa da la Svizra. La Naziunala gioga lura glindesdi cunter ils favorits da las Brasilia.

Gieu spezial per Breel Embolo

Per Breel Embolo èsi in duel cun sia segunda patria. L’attatgader svizzer è naschì a Yaoundé, la chapitala dal Camerun. Gia baud è el dentant vegnì cun sia mamma e ses frar a Basilea en Svizra perquai che la famiglia na veseva nagina perspectiva en il Camerun. Avant otg onns ha Embolo survegnì il pass svizzer e lura è el er sa decidì da giugar per la naziunala svizra. Ses bab e la gronda part da sia famiglia viva dentant en il Camerun.

audio
Qatar 2022: Breel Embolo avant il gieu encunter il Camerun
ord Actualitad dals 23.11.2022.
laschar ir. Durada: 3 minutas 31 Secundas.

Breel Embolo – in giugader da tschep

Sin Breel Embolo spetga encunter il Camerun ses 60avel gieu per la naziunala svizra ed uschia in pitschen giubileum. L’attatgader da 25 onns è il mument en sia meglra furma da la carriera. Gia il davos tar Borussia Mönchengladbach e dapi quella stagiun tar ses nov club, l’AS Monaco, sajetta Embolo gols en seria. Ses gols èn uss er dumandads a Qatar per che l’equipa da Murat Yakin haja success durant quest campiunadi mundial.

RTR novitads 14:00

Artitgels legids il pli savens

Scrollar a sanestra Scrollar a dretga