La squadra naziunala svizra da ballape resta senza victoria il 2022. Suenter il 1:2 cunter l’Engalterra ha il team dal trenader naziunal Murat Yakin da sa cuntentar cun in 1:1 en il gieu da test a Turitg cunter il Cosovo. Milot Rashica ha sajettà il gol per il Cosovo en la 52avla minuta e 9 minutas pli tard ha Jordan Lotomba egualisà per la Svizra. Per il defensur da Nice era quai il prim gol en la tschintgavla partida per la squadra naziunala.
Il stadion Letzigrund a Turitg era vendì ora cun 20'800 aspectaturas ed aspectaturs. Il Cosovo è il numer 109 da la rangaziun mundiala da la FIFA, e Granit Xhaka ha dà ses 100avel gieu per la squadra svizra, quai cunter il pajais d'origin da ses geniturs.
