Siglir tar il cuntegn

Header

Ils puncts culminants dal gieu Serbia – Svizra
Or da FIFA WM 2022 dals 02.12.2022.
cuntegn

Serbia – Svizra 2:3 Cun gronda classa en l'otgavelfinal

La naziunala da ballape svizra stat per la terza giada en seria en l'otgavelfinal dal campiunadi mundial da ballape a Qatar. L'equipa da Murat Yakin ha gudagnà il terz e davos gieu da gruppa cunter la Serbia a moda spectaculara cun 3:2. L'emprim gol ha Xherdan Shaqiri sajettà en la 23avla minuta. Lura ha la Serbia vulvì il gieu entras dus gols dad Alexander Mitrovic e Dusan Vlahovic. Anc avant la pausa èsi perencunter reussì a Breel Embolo d'egualisar al 2:2. Il gol decisiv ha Remo Freuler sajettà en la 48avla minuta, quai suenter ina cumbinaziun sco or dal cudesch ed in pass brigliant da Ruben Vargas. En la davosa mes'ura è il gieu vegnì fitg emoziunal. Ils Svizzers han dentant dumagnà questa sfida a moda bravurusa.

Cun in quart gol avessan ils Svizzers schizunt terminà la fasa da gruppa sin l'emprim plaz. Ils Brasilians han numnadamain pers encunter il Camerun cun 0:1. Sco segund da la gruppa spetga uss però il Portugal cun lur superstar Cristiano Ronaldo. La stad aveva la Svizra battì il Portugal en la Nations League cun 1:0. Tuttina valan ils Portugais sco ils favurits. Quest duel d'otgavelfinal è il mardi saira a las 20:00 uras temp svizzer.

Shaqiri sco Ronaldo e Messi

Xherdan Shaqiri ha fatg – sco emprim Svizzer – a trais campiunadis mundials mintgamai almain in gol. Quai il 2014 en la Brasilia, il 2018 en Russia ed uss il 2022 en il Qatar. Sper Shaqiri han sulet ils dus superstars Cristiano Ronaldo e Lionel Messi dumagnà quai tar ils ultims trais campiunadis mundials.

audio
Xherdan Shaqiri procura per la differenza
ord Actualitad dals 03.12.2022. Maletg: Keystone
laschar ir. Durada: 3 minutas.

Avant il gieu – prevista Serbia cunter Svizra

Sin la Svizra spetga sco spetgà il gieu decisiv cunter la Serbia. A la Svizra tanscha pli probabel in pari per cuntanscher la fasa da K.o. Al davos campiunadi mundial il 2018 en Russia avevan ils Svizzers battì ils Serbs en in gieu emoziunal cun 2:1 tras gols da Granit Xhaka e Xherdan Shaqiri.

Manuel Akanji: «Nus pudain tegnair encunter»
Or da FIFA WM 2022 dals 01.12.2022.

Igl è pir la segunda giada che la Svizra frunta sin la Serbia. L’emprim inscunter, al campiunadi mundial il 2018 a Kaliningrad en la Russia, aveva principalmain procurà per lingias grassas pervia da l’affera davart l’evla imperiala. Gia avant il gieu eri vegnì fitg emoziunal e suenter che Xhaka e Shaqiri han pudì decider il gieu per la Svizra, gist ils dus giugaders cun ragischs albanaisas, e festivà lur gols cun mussar l’evla imperiala, è tut escalà. Uss, quatter onns pli tard a Qatar, duai tut vegnir auter e meglier. Il focus duai esser cumplainamain sin il ballape e betg sin la politica.

video
La prevista: Svizra cunter Serbia
Or da Giuventetgna dals 01.12.2022.
laschar ir. Durada: 1 minuta 51 Secundas.

Generaziun dad aur tar la Serbia

Cun la Serbia frunta la Svizra sin in’ulteriura dira nusch. Il cor da l’equipa è l’offensiva, qua ha l’equipa in power enorm cun Mitrovic, Tadic u Vlahovic. Tge qualitad che la Serbia ha, han ins er vis en la qualificaziun per quest campiunadi mundial. Ils Serbs han sajettà en 8 gieus 18 gols e la finala er laschà davos els il favurit dal Portugal. A Qatar n’ha l’equipa da Dragan Stojkovic dentant anc betg dal tut persvadì, principalmain en la defensiva.

audio
La prevista sin il gieu
ord Actualitad dals 02.12.2022.
laschar ir. Durada: 3 minutas 17 Secundas.

Uschia cuntanscha la Svizra l’otgavelfinal:

  • La Svizra gudogna cunter la Serbia.
  • La Svizra gioga pari cunter la Serbia ed il Camerun na gudogna betg cunter la Brasilia.
  • La Svizra gioga pari cunter la Serbia, il Camerun gudogna cunter la Brasilia cun be dapli ch’in gol differenza e la Svizra sajetta en quest cas almain dus gols dapli ch’il Camerun.
Murat Yakin: «Jau quint cun tuts»
Or da FIFA WM 2022 dals 01.12.2022.

Las duas pitgas Sommer ed Elvedi mancan

Yann Sommer e Nico Elvedi manchentan il gieu decisiv en la fasa da gruppa cunter la Serbia. Gregor Kobel stat per Sommer en il gol, Fabian Schär remplazza Elvedi en la defensiun. Sommer ed Elvedi stoppian dar forfait perquai ch'els han piglià dafraid.

En l'offensiva è Xherdan Shaqiri puspè da la partida. En il gieu cunter la Brasilia aveva el stuì schanegiar. Ulteriuras surpraisas na datti betg en la furmaziun dal trenader Murat Yakin.

RTR novitads 23:00

Artitgels legids il pli savens