Vital Albin è vegnì quart en la davosa cursa dal Swiss Bike Cup a Gstaad en il chantun Berna. Quai ha dentant tanschì per restar sin l’emprim plaz dal classament general ed uschia defender la victoria dal 2022. Gudagnà la davosa cursa ha il Tessinais Filippo Colombo ch’ha dacurt dà ses comeback suenter sia greva blessura.
Il Lumnezian ha sco quart pers bunamain ina minuta e mesa sin Colombo ha gudagnà avant il Tudestg Masimilian Brandl ed il Svizzer Marcel Guerrini. Mussà ina stupenta cursa ha er Ursin Spescha da Sevgein sco 13avel.
En il classament general ha Vital Albin, ch’ha tranter auter triumfà en las cursas da Lugano e Savognin, in avantatg da bunamain 100 puncts sin Andrin Gees dal chantun Turitg. Terz e vegnì Nick Burki da Solothurn.
Linda Indergand sisum il podest
Tar las dunnas n’ha Linda Indergand betg mo gudagnà la davosa cursa a Gstaad, la mountainbikera dal chantun Uri ha er gudagnà il classament general, quai avant Rebekka Estermann ed Alessandra Keller. La davosa cursa ha Indergand gudagnà avant Noëlle Buri e Ronja Eibl.