Siglir tar il cuntegn

Header

cuntegn

Tavau Nordic Dario Cologna e sia derniera a chasa

Per passlungistas e passlungists svizzers spetga l’emprim punct culminant da la stagiun – las cursas da la cuppa mundiala da Tavau. Swiss Ski ha selecziunà per questas cursas da chasa 11 atletas e 19 atlets.

Per Dario Cologna èsi las davosas cursas da la cuppa mundiala al pe dal Flüela, la loipa che sa chatta quasi avant ses isch-chasa. Il Jauer ha desistì sin las cursas a Lillehammer en Norvegia la fin d’emna passada per uschia sa focusar anc pli fitg sin las cursas a Tavau. Cologna parta tant en la cursa da sprint sco era a la cursa da distanza sur 15 kilometers. Omaduas cursas vegnan manadas atras en il stil liber. A Tavau Nordic ha Cologna, malgrà tut ses success, anc mai pudì triumfar.

Laurien van der Graaff
Legenda: Laurien van der Graaff parta per la davosa giada avant ses fans da chasa a Tavau. Keystone

Er per Laurien van der Graaff èsi las davosas cursas da la cuppa mundiala a Tavau. Sco Dario Cologna vegn er ella a terminar la fin da la stagiun sia carriera.

Valerio Grond parta cun bunas regurdientschas

In dals trumfs svizzers en la cursa da sprint è Valerio Grond da Tavau. Il giuven da 21 onns aveva dà l’onn passà ses debüt en la cuppa mundiala a las cursas da Tavau Nordic, in debüt ch’era grategià sco giavischà. Grond era vegnì en sia emprima cursa cun l’elita mundiala 6avel. Er quest onn vul il mattadur local sa qualifitgar per ils finals dal sprint ed uschia er puspè gudagnar puncts da la cuppa mundiala.

audio
Alina Meier e Valerio Grond sa legran sin las cursas da chasa
ord Actualitad dals 11.12.2021.
laschar ir. Durada: 3 minutas 31 Secundas.

Ina cursa speziala èsi er per Alina Meier, er ella oriunda da Tavau. Meier ha 25 onns ed è ina da quellas che duess procurar per ils top resultats ord vista svizra ina giada che la carriera da Laurien van der Graaff è a fin. En spezial sa legra Alina Meier da puspè astgar sa preschentar quest onn avant fans ed amis. Avant in onn eran las cursas da Tavau Nordic vegnidas manadas atras senza publicum pervia da la situaziun da corona.

Cla-Ursin Nufer e sia premiera en la cuppa mundiala

Tranter ils atlets che Swiss Ski ha nominà per las cursas da chasa a Tavau figurescha er il num Cla-Ursin Nufer da Rueras. Il Tujetschin da 20 onns dastga parter per l’emprima giada en la cuppa mundiala ed uschia sa mesirar cun la crème de la crème dal sport da passlung. Nufer parta sulet en la cursa da distanza sur 15 kilometers en il stil liber.

Ils Grischuns a las cursas da Tavau Nordic 2021

Laurien van der Graff, Alina Meier, Désirée Steiner, Nadja Kälin, Giuliana Werro, Dario Cologna, Jonas Baumann, Jason Rüesch, Cédric Steiner, Valerio Grond, Cla-Ursin Nufer, Florian Guler, Livio Matossi e Gian Flurin Pfäffli.

Actualitad 07:00

Artitgels legids il pli savens