5 Svizzers en il final
En ils finals da sprint en il stil liber cumbattan tschintg svizzers per in top resultat avant ils fans da chasa. Persvadì en la qualificaziun ha principalmain Valerio Grond. Il matador local è vegnì 9avel en la qualificaziun. Avant in onn tar ses debüt en la cuppa mundiala a Tavau era Grond vegnì sensaziunalmain 6avel en il sprint. Er da la partida en ils finals cun ils megliers 30 èn Roman Schaad sco 10avel, Janik Riebli sco 12avel, Jovian Hediger sco 15avel ed Erwan Käser sco 20avel.
Ils pli sperts en la qualificaziun èn stads ils gronds favurits, Klaebo avant il Franzos Lucas Chanavat ed il Talian Federico Pellegrino.
Fähndrich e van der Graaff persvadan en il prolog
Ils dus gronds trumfs svizzers tar las dunnas, Nadine Fähndrich e Laurien van der Graaff, han persvadì en il prolog dal sprint en il stil liber. Fähndrich ha pers exact trais secundas sin la pli sperta da la qualificaziun, la Slovena Eva Urevc, ed è classada sco quarta. Van der Graaff ha terminà la qualificaziun sco 14avla, ella ha pers bun sis secundas. Omaduas cumbattan il suentermezdi per in plaz da podest al sprint da la cuppa mundiala da chasa a Tavau.
Tut las autras svizras, tranter auter er las duas grischunas Alina Meier e Désirée Steiner, omaduas da Tavau, han manchentà cleramain in plaz sut las top 30 ed uschia la qualificaziun per ils finals.