Cun quai n'avevan ellas betg quintà. La finamira da las giugaduras da tennis da Trun en la categoria 30+ era d'impedir la relegaziun. Uss pon ellas giugar per la promoziun en liga naziunala B. E quai gist en lur emprima stagiun dapi lur promoziun en liga naziunala C.
En la fasa da gruppa na perdan ellas nagin duel. Las damas da Kriens battan ellas ordaifer cun 4 a 2 gieus. Encunter Belvoir Turitg sa resulta in pari da 3 a 3 ed il davos duel da gruppa a chasa gudognan ellas gist cun 4 a 2 gieus encunter las damas da Meggen, ch'èn vegnidas en Surselva sco leadras da gruppa. I vegn adina giugà 4 gieus singuls e dus dubels. Mintga gieu gudagnà dat in punct. Las dunnas da Trun termineschan uschia la fasa da gruppa cun 11 puncts sin l'emprim plaz. Uschia pon ellas giugar il duel da promoziun a chasa sin ils plazs ch'ellas enconuschan gia da pitschnas. Sin tgi l'equipa sursilvana frunta en la promoziun per la liga naziunala B che vegn lura dada il mais zercladur n'è anc betg decidì.
Nossa finamira era da restar en la C, uss giugain per ir si en la B, quai avessan mai pensà.
Da success a success
L'onn passà ha l'equipa da dunnas 30+ da Trun dumagnà a moda suverana la promoziun en liga naziunala C. En quella categoria e liga èn ellas la suletta equipa grischuna. Gia l'onn 2010, lura anc sco activas, avevan ellas procurà per ina surpraisa cun ir si en la C. In factur per lur success, che l'equipa è stedi stada la medema e s'enconuscha fitg bain sur passa 15 onns. Che las damas da Trun pon uss perfin giugar per ir si en la B è era ina surpraisa. Tant pli che tar las equipas adversarias èni fruntadas sin giugaduras classadas meglier.