Roger Federer na turna betg sin il grond palc da tennis. Sco el scriva sin instagram, terminescha el sia carriera suenter il Laver Cup che cumenza l'emna che vegn. Suenter trais onns cun bleras feridas saja per el cler ch'i saja temp da finir sia carriera professiunala. Ils ultims trais onns eran dominads da blessadas e trais operaziuns vi dal schanugl dretg.
Sco ch'el scriva en sia carta da cumià haja el lavurà dir per turnar en furma per giugar, ma el enconuscha er ses corp ed il messadi da quel saja stat cler.
Jau hai giugà passa 1'500 gieus en 24 onns. Il tennis m'ha tractà en ina moda pli generusa che en mes siemis.
Ma ussa renconuschia el ch'i saja temp da finir sia carriera cumpetitiva. En sia carta, ch'el ha legì avant sin Twitter, engrazia el tar sia dunna Mirka, sia famiglia, ses trenaders e tar Swiss tennis.
Adina puspè tranà a Favugn
Var 10 giadas, adina puspè la primavaira, è Roger Federer stà giast sin ils plazs da tennis a Favugn per trenar. Uschia ha er il president dal club da tennis e moderatur dad RTR, Toni Poltera, pudì s'inscuntar cun el a l'ur dal plaz da tennis. Per il temp che Roger Federer era vid trenar aveva el be dus «giavischs spezials»
- il plaz dasperas era medamain reservà per el
- naginas fotografias sin socialmedia ed er betg raquintar enturn dapertut ch'el saja là
Cunquai che quai ha funcziunà bain a Favugn ed ils plazs han era satisfatg il profi, è el adina puspè turnà. Tar l'inscunter sper il plaz è Roger Federer sa mussà sco quai ch'el è er adina sa dà en las intervistas: A moda modesta, interessà vid la glieud ch'era là e senza cunfar da star. L'atmosfera è tenor il president dal club da tennis da Favugn adina stada fitg lucca, lerga e cun respect vicendaivel. Uschia haja Roger Federer er adina piglià temp per far fotografias cun ils fans che han chattà la via a Favugn ed a la fin dal trenament gieva el er sez sur il plaz cun il rastè e schubregiava las lingias. Ed apropos: El ha er tradì ch'el tiria adina en dua pèra soccas perquai che quai saja simplamain pli lom ed empernaivel per giugar.
Ina grondischma carriera
Cun passa 100 victorias tar turniers, 20 grand slams e 310 emnas sco numer in dal mund vala Roger Federer sco in dals megliers giugaders da tennis da l'istorgia. Cun sia moda eleganta er sper il court ha il Svizzer dominà il mund da tennis per passa 20 onns. Nunemblidaivels èn ses duels epics cun ils auters dus represchentants da la «Big Three», Novak Djokovic e Rafael Nadal.
