La giugadra Stefanie Vögele sa retira suenter 17 stagiuns sco profi da tennis, quai scriva Swisstennis sin sia pagina d'internet. Durant in lung temp è la sportista da 32 onns stada commembra dal team da Fed-Cup svizzer e per in curt temp è ella stada il numer in da la Svizra. Stefanie Vögele è dentant adina stada en la sumbriva da giugadras sco Patty Schnyder, Timea Bacsinszky u era Belinda Bencic.
Sin plazza 42 dal mund
Il 2013 ha Vögele cuntanschì la megliera plazza en la rangaziun mundiala, numnadamain plazza 42. Ses gronds success èn stads da cuntanscher il 2018 il final ad Acapulco ed il 2019 la terza runda ad Indian Wells. Er ad in turnier da Grand Slam, numndamain a Paris, ha la giugadra da l'Argovia cuntanschì ina giada la runda trais. Ella saja engraziavla che sia vita saja stada durant ils ultims 17 onns il tennis, ussa dentant saja ella ad in punct nua ch'ella na veglia betg pli far quai a moda professiunala, uschia Vögele.