Il club da hockey da Tavau è sa qualifitgà a moda directa per ils mezfinals da la Cuppa Spengler. Ils Grischuns han gudagnà il duel da prestige cunter il Canada cun 4:3.
Il HCD è ditg stà en retard. Pir en il davos terz ha Tavau pudì volver la partida e midar in retard da 1:3 en in avantatg da 4:3. En il mezfinal frunta il club da hockey da Tavau sonda u sin Ambri-Piotta u sin ils svedais da Göteborg Frölunda. Il Canada gioga venderdi la partida da pre-mezfinal cunter Kalpa Kuopio da la Finlanda.
Era Pardubice cuntanscha mezfinal
La gievgia suentermezdi ha Dynamo Pardubice battì Kalpa Kuopio cun 2:1. Uschia cuntanschan era ils Tschecs directamain ils mezfinals. Ditg è il gieu stà 0:0. Pir en la segunda minuta da l'ultim terz ha Pardubice tutgà per l'emprima giada il gol – e set minutas suenter ha Kalpa pudì egualisar. Il gol da victoria è lura crudà en la 58avla minuta. Il gieu è daventà lura fitg chaud – l'ultima minuta hai dà quatter chastis – ma il resultat è restà.
