Il meglier en furma era il skiunz Thomas Tumler avant in per onns. A Beaver Creek en ils Stadis Unids è el vegni l’onn 2018 terz en il slalom gigant. Là aveva Thomas Tumler pudì cumbatter amez l’elita mundiala tranter Marcel Hirscher e Henrik Kristoffersen per ina plazza da podest. Suenter quel success èn alura dentant vegnì ils problems da sanadad. Surtut il dies ha fat problems a Thomas Tumler. Uschia ch’el ha stuì laschar ora l’entira stagiun 2020/2021.
Nova fiduzia en las atgnas fermezzas
Suenter ils problems cun il dies e la posa sfurzada è il skiunz da 34 onns dentant puspè turnà en la cuppa mundiala da skis. A la fin da la stagiun passada ha el savì mussar uschè bunas prestaziuns ch’el ha pudì ir al final da la cuppa mundiala in Andorra. Là pon ir be ils megliers 25 skiunz da mintga disciplina a la partenza.
A la fin è el vegni tschintgavel dal davos slalom gigant da la stagiun. Quel bun resultat a la fin dad ina lunga stagiun è stà per el il motiv principal per cuntinuar cun sia carriera.
Il «senior» da l’entira equipa da Swiss Ski
Suenter la fin da la carriera activa da Beat Feuz è Thomas Tumler uss il «senior» da l’equipa. Il skiunz da Samignun accumplescha ses 34avel anniversari ed è uschia il pli vegl da l’entira equipa. Per il skiunz è la vegliadetgna be ina cifra. El as senta bain, el ha puspè la fiduzia in sias abilitads ed el è pront per ir almain anc ina stagiun professiunalmain cun skis.