Tgi che patratga vi da cuschina dal Giapun, a quel vegn segir endament il sushi. Mo las rollas u buccadas da ris cun pesch ni legums sco quai che nus enconuschain oz datti pir dapi circa 150 onns.
Mo la 和食‘washoku’ (和 wa = Giapun, 食shoku = tratga) sco la cuschina giapunaisa vegn numnada, ha ina tradiziun bler pli lunga. Emprimas funtaunas dateschan da avant 2'000 onns. E sco cun bleras chaussas en il Giapun è era la tradiziun culinarica vegnida d’ordaifer sin l'insla. L’emprim da la China e pli tard tras muntgs budistics da la Corea. Mo cun ils tschientaners è sa sviluppada ina cuschina tut speziala, cunzunt stagiunala.
Ina schuppa tutga latiers
Quai ch'è tar nus la buglion è en il Giapun la schuppa da miso. Ella datti adina e dapertut, perfin da solver. Miso è ina pasta salada da soja, granezza u ris fermentà ed è sper la sosa da soja ina da las pli impurtantas ingredienzas da la cuschina giapunaisa.
Sper il ris vegn era mangià blers tagliarins. Ramen è ina spaisa fitg derasada ch'ins chatta era pli e pli savens tar nus en Svizra. Ils tagliarins sa nodan en ina schuppa, garnì vegn cun legums u charn.
Ma atgnamain posseda mintga regiun sias spezialitads. El nord datti dapli tartuffels, en il sid persuenter dapli charn e fritgs. Impurtant è dapertut che las ingredienzas èn frestgas e stagiunalas.