Siglir tar il cuntegn

Header

cuntegn

Tour de Ski a Toblach Fähndrich fa bun trais plaz ed è 12avla

Nadine Fähndrich ha oz pudì sa megliurar per trais plazzas tar la cursa da persecuziun sur 20 kilometers skating a Toblach. La Svizra ch'era partida sin plazza 15 è la finala vegnida 12avla. Quai cun in retard da prest duas minutas sin l'americana Jessica Diggins, ch'ha gudagnà la cursa a moda suverana.

En il classament general ha l'americana uschia pudì engrondir ses avantatg sin 46 secundas. Er Ania Weber e Desiree Steiner han dumagnà en la top 30.

video
Fähndrich: «Bler meglier cun problems da respirar ch'ier»
Or da Sport-Clip dals 01.01.2024.
laschar ir. Durada: 1 minuta 47 Secundas.

I gira per Beda Klee

Il passlunghist svizzer Beda Klee ha er persvas en la cursa da persecuziun sur ils 20 kilometers skating suenter sia 6avla plazza dad IER sur ils 10 kilometers classic. Il Toggenburgais da 27 onns è vegnì 7avel a Toblach.

Er en il classament general è Klee uschia il mument sin plazza 7. Cun Cyril Fähdrich sco 16avel e Candide Pralong sco 17avel han dus ulteriurs svizzers dumagnà sut ils top 20. La victoria e la testa al classament general ha segirà il norvegiais Harald Amundsen. Mesemna cuntinuescha il Tour de Ski lura a Tavau.

Mesemna cuntinuescha il Tour de ski lura a Tavau.

Dumengia

Beda Klee fa in ferm plaz 6 tar la segunda etappa dal Tour de ski a Toblach. Tar la cursa sur 10 kilometers stil classic è Klee stà il meglier betg da la Scandinavia. Beda Klee a sulet pers 43 secundas sin il victur, il Finlandais Perttu Hüvärinen. Uschia po il Svizzer partir damaun, tar la persecuziun stil liber sur 20 kilometers da posiziun 10.

video
Klee: «Jau hai partì en fitg bain la cursa»
Or da Sport-Clip dals 31.12.2023.
laschar ir. Durada: 1 minuta 12 Secundas.

Fähndrich fa buna prestaziun

Fähndrich ha tegnì cun, malgrà sia malsogna. Sur 10 km classic en la segunda etappa dal Tour de Ski è ella daventada 27avla. Kerttz Niskanen (FIN) è stada ina minuta e 40 secundas pli svelta che Fähndrich.

video
Fähndrich: «Cuntenta è il pled fallà»
Or da Sport-Clip dals 31.12.2023.
laschar ir. Durada: 1 minuta 40 Secundas.

Fähndrich ha gì problems da respiraziun pervia d'ina infecziun da corona, è dentant stada bain en furma la sonda ed ha cuntanschì il 5avel plaz en l'emprima etappa.

Uschia va Fähndrich sco meglra svizra sin posiziun 14 en la cursa, cun in handicap da ina minuta ed 16 secundas. Per la defensura dal tetel Frida Karlsson, ch'è stada malsauna il december, èsi er ina sfida, ella ha in dischavantatg da ina minuta ed 11 secundas.

Gudagnà la cursa ha la finlandaisa Kerttu Niskanen avant la tudestga Victoria Carl e l'americana Jessica Diggins. Diggins maina uschia era en il classament general.

Team svizzer procura la sonda per ina surpraisa

En l’emprima cursa dal Tour de ski, il sprint en stil liber a Toblach – fa il Grischun Valerio Grond rang 5. Ina victoria suverana po festivar il Franzos Lucas Chanavat, avant ses cumpatriot Jules Chappaz. Rang 3 ed uschia era sin il podest va l’American Ben Ogden.

Cun Valerio Grond, Roman Schaad e Janik Riebli èn en tut trais Svizzers sa qualifitgads per ils quartfinals. Per dapli hai sulettamain tanschì a Grond, cun gudagnar ses heat dals quartfinals e daventar segund da ses mezfinal. Cun far la finala rang 5 egualisescha il Grischun ses meglier resultat en la cuppa mundiala.

Las Svedaisas domineschan

En il final dal sprint en stil liber han las Svedaisas qualifitgadas dà en il tun. Nadine Fähndrich n'ha a la fin betg pudì cumbatter per la victoria, ella è daventada 5avla. Victura è vegnida la Svedaisa Linn Svahn, avant sia cumpatriota Jonna Sundling. Sin rang 3 è currida la Norvegiaisa Kristine Stavas Skistad.

Cun las Grischunas Désirée Steiner ed Alina Meier ed Anja Weber – han en tut quatter Svizras gì dumagnà da vegnir en ils quartfinals. Là ha dentant sulet Nadine Fähndrich pudì sa qualifitgar per ils mezfinals. La qualificaziun per il final ha Fähndrich lura cuntanschì sco lucky loser.

video
La finala mancan las forzas a Nadine Fähndrich
Or da Sport-Clip dals 30.12.2023.
laschar ir. Durada: 3 minutas 19 Secundas.

RTR novitads 17:00

Artitgels legids il pli savens