L'anteriur victur dal Tour de France, il Brit Geraint Thomas è il victur da la 85avla ediziun dal Tour de Suisse. El ha gudagnà il classament general cun passa ina minuta avantatg sin il Columbian Sergio Garcia. Terz è vegnì il Danais Jakob Fuglsang. Meglier Svizzer è vegnì Stefan Küng sco 5avel.
La cursa finala cunter l'ura ha il Beltg, Remco Evenpoel, gudagnà avant Geraint Thomas e Stefan Küng.
40 tests positivs da corona
Per la terza giada entaifer 18 mais è il ciclist slovac Peter Sagan vegnì testà positiv sin il coronavirus. Sagan n'è perquai betg partì a l'etappa finala dal Tour de Suisse. Sagan, ch'è cun 18 etappas victur da record dal tour, ha ditg ch'el n'haja nagins sintoms.
Plirs ciclists èn vegnids testads positiv sin corona ed èn cunquai out tar il Tour de Suisse. Dal team svizzer èn pertutgads Marc Hirschi, Joel Suter e Stefan Bissegger sco er Silvan Dillier dal team Alpecin. Er il leader russ Alexander Wlassow era positivs. Trais teams èn sa retratgs dal tuttafatg da la cursa. Quai èn Bahrain, Alpecin ed UAE Emirates.
6. etappa
Il Tudestg Nico Denz ha gudagnà l'etappa royala dal Tour de Suisse. En il sprint final sin la Moosalp ha Denz battì il Franzos Clement Champoussin. Meglier Svizzer è vegnì Roland Thalmann sco 7avel.
Suenter ch'il leader d'enfin uss il Russ Alexander Wlassow è vegnì testà positiv sin corona ed ha sco 30 ulteriurs ciclists betg pudì ir a la partenza sa numna il nov leader dal classament general Jakob Fuglsang. Il Danais maina ina secunda avant il Brit Geraint Thomas. Meglier Svizzer en il classament general è cun in retard da 49 secundas Stefan Küng sin plazza 7.
5. etappa
Alexander Wlassow ha gudagnà la 5avla etappa dal Tour de Suisse. Il Russ ha gudagnà il sprint tranter ina gruppa da quatter ciclists. Cun sia victoria dad gievgia ha Wlassow era surpiglià il tricot mellen. Meglier Svizzer è stà Stefan Küng sco 7avel. La 5avla etappa dal Tour de Suisse ha manà sur 190 km dad Ambri a Novazzano.
4. etappa
Il victur da la quart'etappa dal «Tour de Suisse» è il Sidafrican – Daryl Impey. En il sprint final ha el battì l'Australian – Michael Matthews. Terz è vegnì Sören Krau Andersen dal Danemarc. Sco meglier Svizzer è Stefan Küng daventà oz 10avel. Uschia resta el sin plazza 5 en il classament general. Er Marc Hirschi, Yannis Voisard, Gino Mäder e Sébastien Reichenbach han pudì finir la quart'etappa dal «Tour de Suisse» cun la gruppa a la testa.
3. etappa
Peter Sagan ha gudagnà la terza etappa dal Tour de Suisse. En tut ha Sagan uschia gia gudagnà 18 etappas dal Tour de Suisse – tantas sco nagin auter. Animatur dal di è stà il Svizzer Stefan Bissegger ch'era 11 kilometers avant la fin anc a la testa. Leader dal Tour de Suisse resta Stephen Williams.
2. etappa
Andreas Leknessund ha gudagnà la segunda etappa dal Tour de suisse. Il Norvegiais da 23 onns ha gì en l'arrivada 38 secundas avanatg sin la gruppa cun ils leaders. Il tricot mellen resta dentant en posses dal Brit Stephen Williams. Meglier svizzer dal di è stà Stefan Küng ch'è vegnì 7avel.
1. etappa
L'emprim leader da la 85avla Tour de Suisse, sa numna Stephen Williams. Il Brit da 26 onns ha procurà en il sprint dals ultims 15 en la gruppa da la testa, per ina surpraisa. Suenter 177,6 kilometers è el sa mess tras cunter il Tudestg Maximilian Schachmann ed il Danais Andreas Kron.
Sco meglier Svizzer è sa classà Marc Hirschi sin rang 4. Stefan Küng è lura vegnì 7avel. Gino Mäder percunter, che valeva sco gronda speranza svizra sin ina buna plazza en il classament general, è vegnì 37avel.