La quarta ed ultima etappa, l'etappa roiala da quest onn, ha manà las dunnas dal Tour de Suisse da la citad da Cuira sur Tavau enfin en l'Arena da biatlon a Lantsch. L'etappa è stada radund 100 kilometers lunga cun passa 2'000 meters differenza d'autezza.
Victura dal di sco er victura dal classament general è l'Ollandaisa Lucinda Brand. Ella ha battì en in sprint final l'Americana Kristen Faulkner ch'è partida en il maillot jaune, chè dentant crudada en la davosa storta en l'Arena da biatlon ed uschia manchentà la victoria dal Tour de Suisse. La finala ha Brand triumfà cun in avantatg da 17 secundas sin Faulkner ch'ha be 25 onns.
Jolanda Neff persvada durant l'entir Tour de Suisse
Meglra svizra tar l'etappa finala è danovamain stada Jolanda Neff. Ella ha cuntanschì l'arrivada sco 10avla cun in retard da bun ina minuta e mesa. Er en il classament general ha Neff pudì defender ses 5avel plaz cun in retard da bun trais minutas.
La campiunessa olimpica da mountainbike ha en questa davosa etappa anc ina giada empruvà tut ed attatgà direcziun Alvagni. A Casti, avant la davosa ascensiun da bun 6 kilometers, era Neff a la testa ensemen cun Lucinda Brand, quai cun in avantatg da bunamain ina minuta. Sin ils davos kilometers han però las forzas mancà per pudair cumbatter per ina plazza da podest. Direcziun Tavau aveva gia Sina Frei attatgà e suenter Tavau Alessandra Keller.
Classament final dal TdS Women:
1. Lucinda Brand NED 7:52:46 uras
2. Kristen Faulkner USA +0:17 min.
3. Paulien Rooijakkers NED +1:19 min.
5. Jolanda Neff SUI +3:01 min.
14. Alessandra Keller SUI +5:22 min.
18. Steffi Häberlin +6:48 min.
22. Sina Frei +8:13 min.
Terza etappa è stada da Vaduz a Cuira
La terza etappa da la «Tour de Suisse Women» ha manà las ciclistas da Vaduz a Cuira. En tut han ellas stuì surmuntar 124,2 kilometers, cun muntadas a Gais ed il Pass da Son Gliezi. L'arrivada è stada sut il Fürstenwald dasper la stalla dal Waldhaus a Cuira.
Ord motivs organisatorics, pervi dal traffic, na saja betg stà pussaivel da far l'arrivada amez da la citad da Cuira, sco Victor Zindel, il schef dal comité d'organisaziun da Cuira, di. I saja dentant pussaivel da lantschar la quarta e davosa etappa damaun amez la citad. La partenza è a las 14:20 sin il Kornplatz e va sur Casti fin a l'arena da biatlon a Lantsch.