NHL ord funcziun
In che n’è betg turnà en patria durant quest temp da crisa è Roman Josi. Il defensur dals Nashville Predators è restà en si'abitaziun a Nashville. Ma la vita da Josi ha pers d'in mument sin l’auter sia vart spectaculara ed emoziunala. Uss è era sia vita plitost lungurusa e monotona. Enstagl da sajettar gols è Josi sfurzà da star a chasa e trenar forza e cundiziun, enstagl da brigliar en ils stadions da hockey avant millis da fans.
Betg passar en il resgim
Pertutgà dal coronavirus èn er ils lutgaders ch’avessan gugent cumenzà en curt la nova stagiun. Pliras festas da lutga èn dentant gia vegnidas spustadas u annulladas. Nagin sa propi cura e sche la stagiun da lutga cumenza insumma. Il retg da lutga Christian Stucki prenda quai cun umor. Uss stoppia el era endrizzar in center da fitness en sia garascha. Impurtant saja dentant che tuts e tuttas sa tegnian il mument vid las directivas dal Cussegl federal, e prendi serius questa crisa d’epidemia.
Appel da Roger Federer
Roger Federer sustegna il cusseglier federal Alain Berset en ils sforzs da far star la glieud a chasa.
Nus stuain prender quai serius, fitg serius.
En in video avant la culissa dals culms da Lai – fa Federer attent la glieud quant dramatica che la situaziun è. El fa attent sin las pli impurtantas reglas da cumportament: Avair dus meters distanza in da l’auter e betg dar il maun in a l’auter. Er el restia il mument l’entir temp a chasa.